विश्व अर्थतन्त्र दबाबमा, महामारीपछि सुध्रिएको अर्थतन्त्र पुनः बिग्रने प्रक्षेपण

काठमाडौं । युक्रेनमा भएको रुसको आक्रमण, मुद्रास्फीतिमाथिको फराकिलो दबाब र चीनमा अपेक्षा अनुसार आर्थिक वृद्धि नहुनुजस्ता कारण विश्वव्यापी रुपमा अर्थतन्त्रले ठूला चुनौतीहरुको सामना गरिरहेको अन्तराष्ट्रिय मुद्रा कोष (आइएमएफ)ले जनाएको छ ।

आइएमएफले रिपोर्ट प्रकाशित गर्दै विश्वभरको अर्थतन्त्रमा ठूला चुनौतीहरुको सामना गर्नुपर्ने अवस्था आएको जनाएको छ ।आइएमएफको प्रक्षेपणअनुसार यो वर्ष विश्वव्यापी अर्थतन्त्रको बृद्धि ३.२ प्रतिशतमा रोकिएको छ । गत जुलाईमा गरिएको प्रक्षेपणभन्दा ०.२ प्रतिशत कम हुँदै आगामी वर्षको आर्थिक बृद्धि पनि २.७ प्रतिशतमा संकुचित हुने आइएमएफको प्रक्षेपण छ ।

आइएमएफले सन् २०२३ मा फराकिलो किसिमले आर्थिक मन्दी देखिने बताएको छ, जसमा विश्वको अर्थतन्त्रको एक तिहाई हिस्सा ओगट्ने देशहरु यो वर्ष वा अर्को वर्षसम्ममा थप संकुचित हुने देखिएका छन् । कोरोना महामारीपछि आंशिक रुपमा सुधार भएको अर्थतन्त्र पुनः संकुचित अवस्थामा आउने र धेरैभन्दा धेरै मानिसले आगामी वर्ष २०२३ मा आर्थिक मन्दी महसुस गर्ने आइएमएफले जनाएको छ ।

आइएमएफका अनुसार अमेरिकामा संकुचित मौद्रिक तथा वित्तीय अवस्थाका कारण आगामी वर्ष आर्थिक बृद्धि १ प्रतिशतले कम हुने प्रक्षेपण गरिएको छ । त्यस्तै, चीनमा पनि कमजोर भइरहेको सम्पत्ती क्षेत्र र निरन्तर भइरहेको लकडाउनका कारण आर्थिक वृद्धि ४.४ प्रतिशतमा संकुचित हुने अनुमान गरिएको छ । त्यस्तै, युरोपेली क्षेत्रमा पनि रुस र युक्रेनको युद्धका कारण भइरहेको उर्जा संकटले ठूलो प्रभाव पारिरहेको छ । जसकारण आर्थिक बृद्धि ०.५ प्रतिशतले कम हुने आइएमएफको प्रक्षेपण रहेको छ ।