विश्व स्वास्थ्य संगठनले दियो फाइजर–बायोएनटेक खोपलाई प्रयोगको अनुमति, नेपालमा कहिले ?

एजेन्सी । विश्व स्वास्थ्य संगठन (डब्लुएचओ) ले बिहीबार फाइजर–बायोएनटेकले विकास गरेको कोभिड–१९ विरुद्धको खोपलाई आपतकालीन प्रयोगका लागि अनुमति दिएको छ ।

संगठनले खोप स्वीकृत गरेसँगै विश्वका विभिन्न देशले फाइजरका खोप आयात र वितरण गर्न थप सहज बनाएको छ ।

बेलायतले गत डिसेम्बर ८ मै फाइजरको खोपलाई अनुमति सहित आमजनतालाई खोप दिन थालिसकेको छ । साथै यी खोप अमेरिका, क्यानाडा र युरोपेली संघमा आबद्ध मुलुक सहित अन्य कतिपय मुलुकले प्रयोगमा ल्याएका छन् ।

कोरोनाभाइरस विरुद्ध आपतकालीन प्रयोगका लागि डब्लुएचओबाट खोप स्वीकृत प्राप्त गर्ने फाइजर पहिलो कम्पनी हो ।

डब्लुएचओका वरिष्ट अधिकृत म्यारिएन्जेला सिमाओले फाइजरको खोपले अनुमति प्राप्त गर्नु निकै सकारात्मक कदम भएको र यसबाट विश्वका अन्य मुलुकले पनि यस खोपमा सहज पहुँच हासिल गर्ने विश्वास व्यक्त गरे ।

डब्लुएचओका अनुसार युनिसेफ जस्ता मानवीय सहायता निकायहरुले फाइजरका खोप खरिद गरेर अति जरुरी परेका मुलुकमा आपूर्ति गर्न पनि यसले बाटो खोलेको छ ।

फाइजर–बायोएनटेकले विकास गरेको खोपको सुरक्षा, प्रभावकारिता र गुणस्तर जाँच गर्न डब्लुएचओले विश्वभरबाट तथ्याँक संकलन गरी विश्लेषण गरेको थियो । विज्ञहरुको टोलीले गरेको अध्ययनमा कोभिड–१९ बाट सिर्जना हुने जोखिम न्यून गर्न फाइजरका खोप निकै प्रभावकारी देखिएको डब्लुएचओले जनाएको छ ।

उक्त खोप नेपालमा कहिले आउला भन्ने अनुमान समेत शुरु भएको छ । नेपालमा खोप ल्याउने तयारी भइरहेको भएपनि सरकारको प्रयास भने हालसम्म सार्थक बन्न सकेको छैन । सरकारले सरकारी स्तरमा नै खोप आयात गर्ने तयारी थालेको बताएको छ । पछिल्ला दिनमा भएका प्रगतिका बारेमा भने केही बताएको छैन ।

भारतमा समेत खोप प्रयोगका सम्बन्धमा थुप्रै तयारी भइरहेको छ । यस्तै चीनमा त स्वदेशी खोप नै प्रयोग गरिएको छ । खोप लगाएका कामदार समेत नेपाल आएर काम शुरु गरिसकेका छन् ।