कुलमान सर दाङका यी जनताको गुनासो पनि एकपटक सुन्ने कि ?
काठमाडौं । नेपाल विद्युत प्राधिकरणले अनलाइनबाट पनि महसुल बुझाउने व्यवस्था गरेको छ । त्यसका लागि एप नै बनाएको छ ।
एपमार्फत पनि महसुल बुझाउन सकिन्छ । चलनचल्तीमा विभिन्न प्रकारका एपहरु तथा पे वालेट समेत सञ्चालनमा छन् ।
तर यी त भए जान्नेका लागि । केही जाने बुझेका र सूचना प्रविधिको क्षेत्रमा जानकारका लागि यी उपाय सजिलै र सहज छन् । तर नजान्नेका लागि भने अझै पनि चर्को घाममा लाइन लागेर महसुल बुझाउनुपर्ने बाध्यता रहेको छ ।
आइतबार विद्युत कार्यालय घोराही वितरण केन्द्रमा विद्युतको महसुल बुझाउन आएका घोराही-६ का हर्कबहादुर डाँगीले गुनासो गर्दै भने, ‘हामीले सरकारलाई पैसा बुझाउँछौभन्दा पनि यति सास्ती खेप्नुपर्ने ?’
विद्युत कार्यालय घोराही वितरण केन्द्रमा घण्टौं लाइनमा बस्दा पनि पालो नआएपछि उहाँको आक्रोश झन् बढेको थियो ।
‘५० रुपैयाँ टेम्पुलाई तिरेर आएको जाँदा ५० तिर्ने हो । १०० रुपैयाँ विद्युत महसुल बुझाउन अरु १०० रुपैयाँ खर्च हुन्छ, अझ दिनभरिको समय पनि त्यत्तिकै बित्छ’ उनले भने ।
उनले गाउँमा किराना पसलको ढोका बन्द गरेर महसुल बुझाउन आएको हुँदा रकमभन्दा पनि एक महिनाको विद्युत् महसुल बुझाउन एकदिन पूरै खर्च गर्नुपर्दा आफूजस्ता हरेक सेवाग्राहीलाई अन्याय भएको बताए ।
घोराही–१ रामपुरबाट विद्युत महसुल बुझाउन आएकी अर्की ग्राहक हरिमाया केसीको व्यथा पनि उस्तै थियो ।
गाडी चढेर १२ बजे कार्यालयमा आएकी उनले ३ बजे मात्रै पालो पाइन् । लगातार तीन घण्टासम्म लाइनमा बस्दा निकै थकाइ महसुस भएको उनले सुनाइन ।
बंगलाचुलीबाट विद्युत महसुल तिर्न आएका रुद्रबहादुर घर्तीको समस्या झन् धेरै थियो । परिवारसहित घोराहीमा किनमेलका लागि आएकी उनलाई दिनभरी महसुल बुझाउने लाइनमा बस्नुपर्दाको सकस कम्ता थिएन ।
दिनभरी लाइनमा बस्नुभन्दा छिटो पालो आए बरु दोब्बर पैसा बुझाउने थिए भन्ने खालको आशय उनले पटक–पटक व्यक्त गरिरहेकी थिइन ।
विद्युत कार्यालय घोराही वितरण केन्द्रमा घोराही उपमहानगर र बंगलाचुली गाउँपालिका गरी करीब ३६ हजार विद्युतका ग्राहक छन् । विद्युत् ग्राहकको संख्याको आधारमा भन्दा पनि प्रत्येक दिन विद्युत् कार्यालयमा १ हजार २०० भन्दा बढी ग्राहक महसुल बुझाउनका लागि आइपुग्छन् तर कार्यालयमा विद्युत् बुझाउने काउन्टर भने २ वटा मात्रै छ ।
यसले गर्दा महसुल तिर्नेको भीडभाड हिजोआज सधैँजसो हुने गरेको सेवाग्राही बताउँछन् । काउन्टरदेखि निकै परसम्म महिला–पुरुषको छुट्टाछुट्टै लाइन लागेका हुन्छन् ।
कार्यालयले दुई महिनाभन्दा बढी समय विद्युत् नबुझाउनेको फटाफट लाइन काट्ने अभियान थालेको हँुदा भीड बढेको हुनसक्ने जनाएको छ ।
विद्युत् कार्यालयले दिएको जानकारीअनुसार अहिलेसम्म समयमा विद्युत् नतिर्ने घोराही १४ र १५ नं वडाका करीब तीन दर्जन ग्राहकको लाइन काटिसकेको छ ।
कार्यालयका सूचना अधिकृत बमबहादुर बुढाथोकीले अब अभियानअन्तर्गत नियमित महसुल नबुझाउनेको लाइन काट्न सुरु गरिसकेको हुँदा महसुल बुझाउन छुटेकाहरु पनि तिर्न आउने क्रम बढेको बताए ।
त्यस्तै विद्युत् कार्यालयमा बढेको भीडको परिणाम पनि लाइन काट्ने अभियान भएको उनले बताए । भने, ‘अब कार्यालयले मासिक विद्युत् महसुल बुझाउनुपर्ने र दुई महिनाभन्दा बढी समय महसुल नबुझाए लाइन काट्ने अभियान थालेपछि भीड बढेको हो ।
उनले थप अगाडि भने, ‘हामीले नियमित विद्युत् नबुझाउनेलाई कारबाहीको दायरामा ल्याउन थालेपछि सेवाग्राही तिर्नका लागि आउने गरेका छन् ।’
केही समय अगाडिसम्म चार काउन्टरबाट विद्युत् महसुल उठाइरहेको कार्यालयमा अहिले दुई काउन्टर बन्द भएका छन् भने दुईबाट मात्र सेवा प्रवाह भइरहेको छ ।
सूचना अधिकृत बुढाथोकीले दिएको जानकारीअनुसार एक कर्मचारीको सरुवा भएपछि र अर्का एक बिरामी भएर उपचारका लागि गएपछि बाध्यतावश दुई काउन्टर बन्द गर्नुपरेको बताए ।
पछिल्लो समय विद्युत् कार्यालयले कम्प्युटर प्रणालीमार्फत विद्युत् महसुल काट्ने र बुझ्ने गर्न थालेपछि काउन्टरमा तालिमप्राप्त कर्मचारीले मात्रै काम गर्न सक्ने अवस्था छ । अहिले विद्युत् कार्यालयमा ५६ कर्मचारी कार्यरत छन् । राससको सहयोगमा
क्लिकमान्डु
