तातोपानी कुण्ड निजि क्षेत्रलार्इ भाडामा दिन प्रस्ताव

म्याग्दी:  प्राकृतिक उपचार स्थलको रूपमा परिचित र पछिल्लाे समय  निकै चर्चामा रहेकाे   तातोपानी कुण्ड सञ्चालनका लागि निजी क्षेत्रलाई भाडामा दिन प्रस्ताव आएको छ ।

ताताेपानी कुण्ड बेनी नगरपालिका–४ मा अवस्थित छ । म्याग्दी प्रवासी नेपाली सङ्घ (मोना) ले बेनी नगरपालिका र सिङ्गा तातोपानी कुण्ड व्यवस्थापन समितिलाई कुण्ड सञ्चालनका लागि निजी क्षेत्रलाई भाडामा दिन प्रस्ताव गरेको हो ।मोनाका अध्यक्ष चक्र थापा र पूर्वअध्यक्ष योगेन्द्र क्षेत्रीले   नगरपालिकाको कार्यालयमा मङ्गलबार आयोजित छलफलमा कुण्ड निजी क्षेत्रलाई भाडामा दिन प्रस्ताव गरेका हुन ।

थापा र क्षेत्रीले निजी क्षेत्रलाइ दिन प्रस्ताव गरे पनि  कुण्ड व्यवस्थापन समितिका अध्यक्ष वीरेन्द्रमान शाक्य र सचिव कृष्ण खड्कालगायतले समुदायसँग छलफल गरेर मात्र निर्णय गर्न सकिने बताए ।  स्थानीयवासी र प्रवासी म्याग्देलीको लगानीमा अहिलेको भन्दा फरक हिसाबले व्यवस्थित रूपमा कुण्ड सञ्चालन गर्न सके पर्यटन प्रवद्धनमा टेवा पुग्ने उनीहरूकाे राय छ ।

लगानी, व्यवस्थापन र सञ्चालनको मोडल स्पष्ट हुनुपर्ने र स्थानीयवासीको भावना बुझ्न थप छलफल गर्ने निर्णय भएको बैठकमा सहभागी कुण्ड व्यवस्थापन समितिका सहसचिव कुमार केसीले जानकारी दिए ।

समुदायद्वारा सञ्चालित र विकास गरिएको कुण्डको आम्दानीले स्थानीय सरस्वती माध्यमिक विद्यालयमा निजी स्रोतका ११ शिक्षकको तलबभत्ताको व्यवस्थापन गरिँदै आएको छ । कुण्डको प्रवेश शुल्क र चन्दा सहयोगबाट पूर्वाधार निर्माण, कर्मचारीको तलब, व्यवस्थापन, नदी नियन्त्रणका साथै सामुदायिक गतिविधि र विकास निर्माणका काम गरिएको छ ।

म्याग्दी नदीको किनारमा जमीनभित्रबाट वीरेनुनको गन्धसहित निस्कने ५० डिग्री सेल्सियस तातोपानी सङ्कलन गरिएको तलाउमा स्नान गरेमा ग्यास्ट्रिक, बाथरोग, ढाड दुख्ने, छाला, सुन्निएको, मर्किएको, पेट दुख्ने, खाना रुचि नहुनेलगायतका स्वास्थ्य समस्या निको हुने जनविश्वास छ ।

कुण्डमा वार्षिक १६ हजार भन्दा बढी बिरामी आउने गरेका छन् ।