१ वर्षमै एनआइसी एशिया बैंकको कर्मचारीमा लगानी १२१ %ले बढ्यो, कुन बैंकले कति बढाए ? (सूचिसहित)
काठमाडौं । बजार सुस्त भएपनि बैंकहरु आक्रमक देखिएका छन् । नयाँ शाखा र बजार विस्तारमा बैंकहरु आक्रमक बन्दा कर्मचारी खर्च ह्वात्तै बढेको छ ।
पछिल्लो दुई वर्ष आक्रमक रुपमा अघि बढेको एनआइसी एशिया कर्मचारी खर्चमा पनि उस्तै आक्रमक देखिएको छ ।
एक वर्षको अवधिमा बैंकको कर्मचारी खर्च १२१ प्रतिशतले बढेको छ । ०७४ पुस मसान्तमा साढे ५५ करोड रुपैयाँ कर्मचारी खर्च गरेको एनआइसी एशिया बैंकले ०७५ पुस मसान्तमा कर्मचारीका लागि १ अर्ब २२ करोड खर्च गरेको छ ।
रकमका आधारमा हेर्ने हो भने एनआइसी एशियाले एक वर्षमा ६७ करोड रुपैयाँले कर्मचारी खर्च बढाएको हो । एनआइसी एशिया बैंक निजी क्षेत्रका बैंकहरुमध्ये सबैभन्दा धेरै कर्मचारी खर्च गर्ने बैंक हो ।
बैंकको पोर्टफोलियो बढेपछि त्यसकै अनुपातमा कर्मचारी खर्च पनि बढेको एनआइसी एशिया बैंकका सूचना अधिकारी अर्जुन खनियाँले बताए ।
‘एक वर्षको अवधिमा हामीले १०० वटाभन्दा बढी शाखा विस्तार गरेका छौं, ठूलो संख्यामा कर्मचारी थपेका छौं,’ खनियाँले क्लिकमाण्डूसँग भने, ‘यो अवधिमा हाम्रो पोर्टफोलियो भने ५० प्रतशितभन्दा बढीले बढेको छ । मानव संसाधनमा खर्च गरेकै कारण बैंकको पोर्टफोलियो चमत्कारिकरुपमा बढेको हो ।’
त्यतिमात्रै नभई, बैंकले आफ्ना कर्मचारीहरुलाई आकर्षक सेवा सुविधा दिएकाले पनि कर्मचारी खर्च बढ्दै गएको उनको भनाई थियो ।
त्यसैगरी, दोस्रो धेरै कर्मचारी खर्च बढाउनेमा मेगा बैंक छ । एक वर्षको अवधिमा मेगा बैंकले १०८ प्रतिशतले कर्मचारी खर्च बढाएको छ ।
०७४ पुस मसान्तमा २४ करोड ९२ लाख रुपैयाँ कर्मचारी खर्च गरेको मेगा बैंकले ०७५ पुस मसान्तमा ५१ करोड ८३ लाख रुपैयाँ कर्मचारी खर्च गरेको छ । रकमका आधारमा मेगा बैंकले २६ करोड ९१ लाख रुपैयाँले बढेको हो ।
तेस्रो धेरै कर्मचारी खर्च बढाउनेमा सानिमा बैंक छ । सानिमा बैंकले एक वर्षमा ६०.८२ प्रतिशतले कर्मचारी खर्च बढाएर ५८ करोड १० लाख रुपैयाँ पुर्याएको छ ।
त्यसैगरी, कर्मचारी खर्च बढाउने सूचीमा जनता बैंक चौथो स्थानमा छ । जनताले एक वर्षको अवधिमा ५४.६७ प्रतिशतले बढाएर ०७५ पुस मसान्तमा ५३ करोड ५२ लाख रुपैयाँ कर्मचारी खर्च गरेकोछ ।
माछापुच्छ्रे बैंक पाँचौ स्थानमा छ । माछापुच्छ्रेले एक वर्षको अवधिमा ५२.९६ प्रतिशतले कर्मचारी खर्च बढाएर ०७५ पुस मसान्तमा ६१ करोड २२ लाख रुपैयाँ पुर्याएको छ ।
नेपाल बंगलादेश (एनबी) बैंक छैठौं स्थानमा छ । यो बैंकले एक वर्षको अवधिमा ५१.५८ प्रतिशतले अर्थात् बढाएर ४५ करोड ६३ लाख रुपैयाँ पुर्याएको छ ।
त्यसैगरी, एनएमबि, सिटिजन्स, सिद्धार्थ र लक्ष्मी बैंकले क्रमशः ४८.२१, ४७.९०, ४७.३१ र ४१.२७ प्रतिशतले कर्मचारी खर्च बढाएका छन् ।
सबैभन्दा कम कर्मचारी खर्च बढाउनेमा नेपाल बैंक छ भने कृषि विकास बैंकको कर्मचारी खर्च उल्टै घटेको छ ।
एक वर्षको अवधिमा नेपाल बैंकले ०.३६ प्रतिशतले कर्मचारी खर्च बढेको छ भने कृषि विकास बैंकको ०.९८ प्रतिशतले कर्मचारी खर्च घटेको छ ।
| Bank | Poush 075 | Poush 074 | Year to year Growth | |
| Prime | 355,245 | 292,255 | 62,990 | 21.55% |
| Century | 443,710 | 327,550 | 116,160 | 35.46% |
| Nepal Bangladesh | 456,337 | 301,061 | 155,276 | 51.58% |
| Laxmi | 460,752 | 326,154 | 134,598 | 41.27% |
| Kumari | 461,963 | 388,385 | 73,578 | 18.94% |
| Citizens | 480,122 | 324,625 | 155,497 | 47.90% |
| Mega | 518,387 | 249,238 | 269,149 | 107.99% |
| Sunrise | 521,804 | 392,677 | 129,127 | 32.88% |
| Janata | 535,226 | 346,053 | 189,173 | 54.67% |
| Nepal Credit & Commerce | 551,773 | 387,509 | 164,264 | 42.39% |
| Sanima | 581,081 | 361,325 | 219,756 | 60.82% |
| Machhapuchchre | 612,231 | 400,262 | 211,969 | 52.96% |
| NMB | 679,914 | 458,740 | 221,174 | 48.21% |
| Siddhartha | 715,044 | 485,402 | 229,642 | 47.31% |
| Nepal SBI | 734,718 | 641,246 | 93,472 | 14.58% |
| Himalayan | 753,644 | 666,848 | 86,796 | 13.02% |
| Global IME | 782,875 | 661,292 | 121,583 | 18.39% |
| Nepal Investment | 790,397 | 644,899 | 145,498 | 22.56% |
| Prabhu | 800,493 | 606,607 | 193,886 | 31.96% |
| Everest | 803,858 | 723,236 | 80,622 | 11.15% |
| Nabil | 946,099 | 765,657 | 180,442 | 23.57% |
| Nepal Bank | 1,224,590 | 1,220,199 | 4,391 | 0.36% |
| NIC Asia | 1,226,348 | 554,708 | 671,640 | 121.08% |
| Agriculture Dev | 1,514,568 | 1,529,546 | (14,978) | -0.98% |
पुष्प दुलाल
