काठमाडौं । भारत तथा दक्षिण एसियाका लागि बैंकका प्रमुख कार्यकारी अधिकृत (सीईओ) पीडी सिंहले तीन दिने औपचारिक नेपाल भ्रमण सम्पन्न गरेका छन् ।
जुलाई १९ देखि २१ सम्म भएको यस भ्रमणका क्रममा सिंहले नेपालका विभिन्न सरोकारवालाहरूसँग भेटघाट गरी बैंकको अन्तर्राष्ट्रिय सञ्जाल र विशेषज्ञतामार्फत नेपालको आर्थिक विकासमा सहयोग गर्ने प्रतिबद्धता दोहोर्याएका छन् ।
भ्रमणका क्रममा सीईओ सिंहले नेपाल सरकारका उच्च अधिकारी र नियामक निकायका नेतृत्वसँग महत्त्वपूर्ण छलफल गरेका थिए । उनले अर्थमन्त्री डा. स्वर्णिम वाग्ले, राष्ट्रिय योजना आयोगका उपाध्यक्ष डा. गुणकर भट्ट र नेपाल राष्ट्र बैंकका डेपुटी गभर्नर किरण पण्डितसँग छुट्टाछुट्टै भेटवार्ता गरेका थिए ।
ती भेटहरूमा नेपालको विकासका प्राथमिकता, लगानीका अवसरहरू र दिगो आर्थिक वृद्धिका लागि आवश्यक सहकार्यका विषयमा विस्तृत छलफल भएको बैंकले जनाएको छ ।
आफ्नो भ्रमणको अवसरमा आयोजित एक विशेष नेटवर्किङ कार्यक्रममा बोल्दै सिंहले भने, ‘हाम्रो विश्वव्यापी सञ्जाल दक्षिण एसियाली अर्थतन्त्रलाई विश्व बजारसँग जोड्न सक्षम छ । बैंकको अन्तरदेशीय कर्जा, वित्तीय परामर्श र अनुकूलित व्यापारिक समाधानले नेपाल जस्ता बजारका ग्राहकहरूलाई विकासतर्फ लैजान मद्दत पुग्नेछ, जसले अन्ततः देशको आर्थिक विकासलाई थप इन्धन प्रदान गर्नेछ ।’
उक्त कार्यक्रममा स्ट्याण्डर्ड चार्टड बैंकका प्रमुख कर्पोरेट कार्यकारीहरू, बैंकिङ क्षेत्रका नेतृत्वहरूको सहभागिता रहेको थियो ।
प्रतिक्रिया