एजेन्सी । चीनले जुलाई महिनाका लागि प्रशोधित इन्धन निर्यातमा लगाइएको प्रतिबन्ध हटाएको छ र चार महिनाको रोकपछि एक निजी रिफाइनरलाई पुनः ढुवानी सुरु गर्न अनुमति दिएको छ ।
विश्वको सबैभन्दा ठूलो रिफाइनर (चीन) इरान युद्धका कारण उत्पन्न अवरोधहरूपछि सामान्य अवस्थातर्फ फर्किंदै गर्दा व्यापारिक स्रोतहरूले बुधबार यस्तो जानकारी दिएका हुन् ।
एसियाकै ठूला निर्यातकहरूमध्ये एकबाट प्रशोधित इन्धनको निर्यात पुनः सुरु हुनु अमेरिका र इरानबीचको अन्तरिम शान्ति सम्झौतापछि भएको हो । यसले गर्दा उक्त क्षेत्रमा यातायातका इन्धनको मूल्यमा कमी आउने अपेक्षा गरिएको छ जहाँ मार्च महिनामा बेइजिङले आन्तरिक आपूर्ति सुरक्षित गर्न ढुवानीमा रोक लगाएपछि उपभोक्ताहरू मुद्रास्फीतिसँग जुधिरहेका थिए ।
यसले सरकारी रिफाइनरहरूलाई बलियो निर्यात मार्जिनबाट फाइदा लिन उत्पादन बढाउन प्रोत्साहित गर्न सक्छ जसले विश्वको शीर्ष आयातकर्ता चीनमा हुने तेल ढुवानीमा पुनरुत्थान ल्याउन सहयोग पुर्याउँछ ।
रोङसेङ पेट्रोकेमिकलको मुख्य स्वामित्व रहेको झेजियाङ पेट्रोकेमिकल कम्पनीलाई जुलाई महिनामा इन्धन निर्यात गर्न अनुमति दिइएको छ, यस मामिलाबारे जानकारी भएका चार स्रोतहरूले बताएका छन् । यस कम्पनीले तीन महिनाभन्दा बढी समयदेखि निर्यात रोकेको थियो ।
चीनको वाणिज्य मन्त्रालय र राष्ट्रिय विकास सुधार आयोगले यसबारेमा पठाइएको फ्याक्स अनुरोधको तत्काल कुनै जवाफ दिएका छैनन् । रोङसेङले पनि टिप्पणीका लागि गरिएको अनुरोधको तत्काल कुनै जवाफ दिएको छैन । सञ्चारमाध्यमसँग बोल्ने अधिकार नभएका कारण स्रोतहरूले आफ्नो नाम बताउन अस्वीकार गरे ।
पछिल्ला केही महिनादेखि केवल सरकारी स्वामित्वका कम्पनीहरूलाई मात्र पेट्रोल, डिजेल र जेट इन्धन निर्यात गर्न अनुमति दिइएको थियो । उनीहरूले हरेक महिना परिमाणका लागि निवेदन दिनुपर्ने व्यवस्था थियो ।
रिफाइनरहरूले यस महिना हङकङ र मकाउका लागि बोन्डेड परिमाणसहित करिब ३० लाख मेट्रिक टन इन्धन निर्यात गर्ने योजना बनाएका छन् जुन गत वर्षको औसत निर्यात परिमाण जस्तै रहेको अन्य दुई स्रोतले बताएका छन् । यद्यपि, यी कार्गोहरूको समयतालिका मिलाउने काम अझै जारी रहेको र यस हप्ताको अन्त्यसम्ममा टुंगो लाग्ने उनीहरूले बताए ।
यसअघि रोयटर्सले जुलाईका लागि निर्यात करिब २० लाख टन हुने रिपोर्ट गरेको थियो । अगस्ट महिनामा पनि निर्यात प्रतिबन्ध हट्ने क्रम जारी रहन्छ कि रहँदैन भन्ने कुरा अझै स्पष्ट भइनसकेको दुई स्रोतले थप गरेका छन् ।
अमेरिका–इरान अन्तरिम सम्झौताले पश्च्मि एसियाली तेल निर्यातमा वृद्धि ल्याइसकेको थियो जसले विश्वव्यापी मूल्य घटाएको थियो र आपूर्ति सम्बन्धी चिन्ताहरू घटाएको थियो । यस हप्ताका आक्रमणहरूले बजारलाई पुनः त्रसित पारेको छ र मूल्य फेरि बढाएको छ ।
जुलाई महिनाका लागि चीनको पेट्रोल निर्यात ४ लाख मेट्रिक टनभन्दा बढी हुन सक्ने दुईमध्ये एक स्रोतले बताएका छन् जुन प्रारम्भिक योजनामा ४० हजार टनभन्दा थोरै कम थियो । यसैबीच डिजेल निर्यात यसअघिको करिब २ लाख टनबाट बढेर ६ देखि ७ लाख टनसम्म पुग्न सक्छ भने जेट इन्धनको निर्यात अघिल्लो १५ लाख टनबाट बढेर करिब १९ लाख टनसम्म पुग्न सक्ने दोस्रो स्रोतले जानकारी दिएका छन् ।
अन्य दुई व्यापारिक स्रोतका अनुसार चिनियाँ रिफाइनरहरूका लागि निर्यात मार्जिन अझै लाभदायक रहेको छ जुन यस हप्ता प्रतिटन १ हजार वा त्यसभन्दा बढी रहेको छ ।
एफजीई नेक्सान्टईसीएका विश्लेषकहरूले एक रिपोर्टमा भनेअनुसार, निर्यात प्रतिबन्ध खुकुलो भएपछि रिफाइनरहरूले सम्भवतः आफ्ना बाँकी कोटाहरू प्रयोग गर्ने लक्ष्य राख्नेछन् । इलेक्ट्रिक सवारी साधनहरूको बढ्दो प्रयोगका कारण आन्तरिक मागमा दबाब परेकाले यस वर्षको अन्त्यतिर डिजेलको तुलनामा पेट्रोल निर्यातमा थप वृद्धि हुने उनीहरूको ठम्याइ छ ।
प्रतिक्रिया