अर्जेन्टिनी फुटबलमा नयाँ इतिहास: बाबुको पदचाप पछ्याउँदै पाज र सिमियोनी

एजेन्सी । अर्जेन्टिनाको राष्ट्रिय फुटबल टोलीका युवा खेलाडीहरू निको पाज र जिलियानो सिमियोनीले अविश्वसनीय सफलता हात पारेका छन् । उनीहरू सन् २०२६ को फिफा विश्वकपका अर्जेन्टिनाको टोलीमा पहिलो पटक परेका छन् जसले अर्जेन्टिनी फुटबलमा एउटा नयाँ इतिहास रचेको छ ।

अर्जेन्टिनी टोलीको ९६ वर्षको विश्वकप इतिहासमा, पूर्व विश्वकप खेलाडीका छोराहरू राष्ट्रिय टोलीमा छनोट भएको यो पहिलो पटक हो ।

यो घटना विशेष छ । किन भने, यी दुईका बुबाहरू सन् १९९८ को विश्वकपमा अर्जेन्टिनाका लागि एकैसाथ खेलेका सहकर्मी थिए ।

हामी जिलियानोका बुबा, दिग्गज प्रशिक्षक डिएगो सिमियोनी र निकोका बुबा पाब्लो पाजको कुरा गर्दैछौँ । अहिले उनीहरूका छोराहरू पनि विश्वकपको यात्रामा एउटै राष्ट्रिय टोली खेल्दै छन् ।

चाखलाग्दो कुरा के छ भने, यी दुवै युवा खेलाडीहरूमा अर्को एउटा समानता पनि छ । यी दुवैको जन्म अर्जेन्टिना बाहिर भएको हो । निकोको जन्म स्पेनको सान्ता क्रुज डे टेनेरिफमा भएको थियो भने जिलियानोको जन्म इटालीको रोममा भएको थियो । विदेशमा जन्मिए पनि उनीहरूले अर्जेन्टिनाको प्रसिद्ध ‘नीलो र सेतो’ जर्सी लगाउने अवसर पाएका छन् ।

अर्जेन्टिनी फुटबलमा नयाँ इतिहास

अर्जेन्टिनाका लागि यसअघि पनि बाबु-छोराको जोडीले राष्ट्रिय टोलीबाट खेलेका उदाहरणहरू छन्, तर पूर्वविश्वकप खेलाडीका छोरा विश्वकप टोलीमा परेको यो नै पहिलो पटक हो ।

निकोका बुबा पाब्लो पाजको फुटबल करियर तुलनात्मक रूपमा सामान्य थियो। पूर्व सेन्टर-ब्याक उनले राष्ट्रिय टोलीका लागि १४ खेल मात्र खेलेका थिए। उनले अर्जेन्टिना र स्पेनका क्लबहरूबाट व्यावसायिक फुटबल खेलेका थिए। उनले करिब दुई दशक फुटबल खेले पनि कुनै ठूला ‘टप-टियर’ क्लबहरूमा भने स्थान बनाउन सकेनन् ।

यसको विपरीत, डिएगो सिमियोनीको करियर भने निकै शानदार रह्यो । पूर्व मिडफिल्डर उनले सन् १९८८ देखि २००२ सम्म अर्जेन्टिनाका लागि १०८ खेल खेले । उनले सेभिया, एथ्लेटिको म्याड्रिड, इन्टर मिलान, लाजियो र रेसिङ क्लब जस्ता विश्वविख्यात क्लबहरूबाट खेले । प्रशिक्षकको रूपमा पनि उनले उत्तिकै सफलता पाएका छन्; सन् २०११ देखि एथ्लेटिको म्याड्रिडको प्रशिक्षक रहेका उनले टोलीलाई धेरै महत्त्वपूर्ण उपाधिहरू दिलाएका छन् ।

यहाँ अर्को एउटा रोचक संयोग पनि छ । सन् १९९८ को विश्वकपमा पाब्लो पाज र डिएगो सिमियोनीसँगै खेलेका रोबर्टो आयला अहिले अर्जेन्टिनाको सहायक प्रशिक्षक छन् । उनी अहिले आफ्नै पूर्व सहकर्मीका छोराहरूलाई प्रशिक्षण र मार्गदर्शन दिइरहेका छन् ।