फ्रिजबाट गन्ध आउँछ ? खानेकुरा ताजा राख्न र दुर्गन्ध हटाउन यसो गर्नुहोस्

एजेन्सी । गर्मी मौसममा फ्रिजको प्रयोग अत्यधिक हुन्छ । तर, फ्रिजमा विभिन्न किसिमका खानेकुरा राख्दा कहिलेकाहीँ नराम्रो गन्ध आउने वा ओसका कारण खानेकुरा चाँडै बिग्रने समस्या देखिन्छ ।

यी समस्याहरूको समाधान तपाईंको भान्सामा उपलब्ध साधारण ‘नुन’ बाट हुन सक्छ ।

एक रिपोर्टअनुसार, फ्रिजमा एक कचौरा नुन राख्नाले धेरै किसिमका फाइदाहरू पुग्छन् ।

जान्नुहोस्, यो सामान्य देखिने तरिकाले कसरी काम गर्छ:

१. नराम्रो गन्ध हटाउन प्रभावकारी
फ्रिजमा राखिएका धेरै थरीका खानेकुराहरू (जस्तै: प्याज, लसुन वा मसलादार खाना) का कारण एक किसिमको गन्ध फैलिन्छ । नुनमा गन्ध सोस्ने क्षमता हुन्छ । यदि तपाईंले एउटा सानो कचौरामा नुन राखेर फ्रिजको एक कुनामा राख्नुभयो भने, यसले फ्रिजभित्रको दुर्गन्ध सोसेर वातावरण ताजा राख्न मद्दत गर्छ ।

२. ओस नियन्त्रण गर्ने
गर्मीमा फ्रिज खोल्दा वा बन्द गर्दा भित्र ओस जम्मा हुने गर्छ, जसका कारण सागसब्जीहरू चाँडै गल्ने वा बिग्रने डर हुन्छ । नुनले हावामा भएको अतिरिक्त ओसलाई सोस्ने काम गर्छ । यसले फ्रिजभित्रको आर्द्रता सन्तुलनमा राख्छ र तरकारी तथा फलफूलहरूलाई लामो समयसम्म ताजा राख्न सहयोग पुर्‍याउँछ ।

३. किटाणुनाशकको रूपमा काम गर्ने
नुनमा प्राकृतिक रूपमै एन्टि-ब्याक्टेरियल गुण हुन्छ । यसले फ्रिजभित्र हानिकारक ब्याक्टेरिया वा फंगस (ढुसी) पलाउन दिँदैन । यसले फ्रिजको सरसफाइ कायम राख्न र खानेकुरालाई स्वच्छ राख्न मद्दत गर्छ ।

४. फ्रिज सफा गर्न सहज

यदि फ्रिजमा कुनै खानेकुरा पोखिएर दाग बसेको छ भने, नुन र कागतीको रस मिसाएर सफा गर्दा दाग सजिलै हट्छ । यसले फ्रिजलाई चम्किलो बनाउनुका साथै भित्रको हानिकारक रसायनहरूको प्रयोगलाई पनि कम गर्छ ।

कसरी गर्ने प्रयोग ?

एउटा सानो खुला कचौरामा २-३ चम्चा साधारण नुन राख्नुहोस् । यसलाई फ्रिजको यस्तो ठाउँमा राख्नुहोस् जहाँ यो नपोखियोस् । प्रत्येक हप्ता वा १० दिनमा उक्त नुन परिवर्तन गर्दा यसको प्रभावकारिता अझ बढी हुन्छ ।

यदि तपाईं पनि फ्रिजको दुर्गन्ध र ओसबाट हैरान हुनुहुन्छ भने, आजै यो घरेलु विधिको प्रयोग गरेर हेर्नुहोस् ।