पुटिनलाई खुला पत्र लेख्दै जेलेन्स्कीले गरे युद्ध अन्त्यको आह्वान

एजेन्सी । युक्रेनका राष्ट्रपति भोलोदिमिर जेलेन्स्कीले रुसका राष्ट्रपति भ्लादिमिर पुटिनलाई खुला पत्र लेख्दै चार वर्षभन्दा लामो युद्ध अन्त्य गर्नका लागि दुई नेताबीच भेटवार्ताको प्रस्ताव गरेका छन् । अन्यथा किभ लडाइँ जारी राख्न तयार रहेको चेतावनी दिएका छन् ।

राष्ट्रपतिको कार्यालयले अमेरिकासहित अन्य देशहरूमा पनि पठाइएको बताएको उक्त पत्रमा जेलेन्स्कीले अधिकांश रुसी जनता युक्रेनी मिसाइल र ड्रोन आक्रमण, मुद्रास्फीति र इन्धनको अभावबाट थकित भइसकेको र उनीहरू शान्तिका लागि तयार रहेको बताएका छन् ।

अमेरिका इरानको द्वन्द्वमा केन्द्रित भएकाले युरोपको युद्ध उसको ध्यानको केन्द्रमा नफर्किएसम्म पर्खिरहनु गलत हुनेछ भनी जेलेन्स्कीले बताएका छन् ।

शान्तिको मार्ग अग्रपंक्तिबाटै सुरु हुनुपर्ने उनले बताए । त्यस रेखाबाट कूटनीति सुरु हुनुपर्ने उनको भनाइ छ । जेलेन्स्कीका अनुसार, युक्रेन वार्ताको अवधिभर पूर्ण युद्धविरामको पक्षमा छ । यो एक मानक अभ्यास हो ।

अमेरिकासँग शत्रुता रोकिएको रेखामा युद्धविरामको अनुगमन गर्ने क्षमता रहेको उनले बताए ।

जेलेन्स्कीले भेटवार्ताका लागि एउटा स्पष्ट मिति तय गर्न प्रस्ताव गरे र स्विट्जरल्यान्ड, टर्की र अरब विश्वका देशहरूलाई उद्धृत गर्दै धेरै देशहरूले परम्परागत रूपमै युद्ध र शान्तिका मुद्दाहरू सुल्झाउन नेताहरूको आतिथ्य सत्कार गर्दै आएको बताए ।

‘यस युद्धबाट बाहिर निस्कने बाटो रोज्न नडराउनुहोस् । अहिले तपाईंबाट आवश्यक मुख्य कुरा यही हो,’ जेलेन्स्कीले लेखेका छन् ।

‘युक्रेनले हामी र तपाईंबीचको प्रत्यक्ष संलग्नतामार्फत यो युद्ध अन्त्य गर्ने प्रस्ताव गर्छ । म भेटवार्ताको प्रस्ताव गरिरहेको छु… तपाईं व्यक्तिगत रूपमा यो युद्ध अन्त्य गर्ने समय आएको निष्कर्षमा पुग्नुहुन्न भने युक्रेन आफ्नो अस्तित्वका लागि लडिरहनेछ ।’
र युद्ध जारी रहेमा यसले पुटिनको व्यक्तिगत पदलाई नै खतरामा पार्न सक्ने जेलेन्स्कीले संकेत गरे ।

‘यो रुसी इतिहासको एउटा तथ्य हो जुन तपाईंलाई राम्ररी थाहा छः जब रुस थकित हुन्छ, तब परिवर्तन आउँछ ।’

मस्कोमा क्रेमलिनले जेलेन्स्कीको पत्र देखेको र यसबारे पुटिनलाई जानकारी गराइने बताएको छ ।

युक्रेनका विदेशमन्त्री एन्ड्री सिबिहाले सामाजिक सञ्जाल एक्समा लेख्दै सो पत्र कूटनीतिक माध्यमबाट आधिकारिक रूपमा पनि पठाइने बताएका छन् ।

सिबिहाले उक्त पत्रलाई स्पष्ट र व्यावहारिक कदमहरू तथा व्यक्तिगत भेटवार्ताको निमन्त्रणासहित युद्ध अन्त्य गर्ने एक गम्भीर र अर्थपूर्ण प्रस्तावको रूपमा वर्णन गरेका छन् ।

‘हामी यस प्रस्तावमा अर्थपूर्ण प्रतिक्रियाको अपेक्षा गर्छौं । यो युद्ध अन्त्य गर्ने समय हो । यो शान्ति रोज्ने समय हो ।’