ट्रम्पले जर्मनीको अटो क्षेत्रमा भन्सार शुल्क बढाउँदा १८ अर्ब डलरको घाटा लाग्ने प्रक्षेपण

एजेन्सी । अमेरिकाका राष्ट्रपति डोनल्ड ट्रम्पले घोषणा गरेको युरोपेली संघका कार र ट्रकहरूमाथिको भन्सार महसुल वृद्धिले जर्मनीको आर्थिक उत्पादनमा झण्डै १५ अर्ब युरो (१७.५८ अर्ब डलर) को क्षति पुर्याउन सक्ने एक आर्थिक संस्थानले शनिबार रोयटर्सलाई बताएको छ ।

कील इन्स्टिच्युट फर द वर्ल्ड इकोनोमीको यस अनुमानले युरोपेली संघको सबैभन्दा ठूलो अर्थतन्त्र (जर्मनी) अमेरिकी आयात महसुलको चपेटामा कति छ भन्ने कुरालाई उजागर गर्छ जसले जर्मन अटोमोटिभ उद्योगलाई यसअघि नै अर्बौंको नोक्सान पुर्याइसकेको छ ।

संस्थानको विश्लेषण अनुसार, दीर्घकालीन रूपमा उत्पादनको क्षति बढेर करिब ३० अर्ब युरो पुग्न सक्ने भन्दै आईएफडब्ल्यूका अध्यक्ष मोरिट्ज शुलारिकले यसको प्रभाव ठूलो हुने बताएका छन् ।

युरोपेली संघले वाशिङटनसँगको व्यापार सम्झौता पालना नगरेको भन्दै ट्रम्पले शुक्रबार अटो महसुललाई यसअघि सहमति भएको १५ प्रतिशतबाट बढाएर अर्को हप्ता २५ प्रतिशत पुर्याउने बताएका छन् ।

आईएफडब्ल्यूका अर्थशास्त्री जुलियन हिन्जले भने, ‘जर्मनीको पहिलेदेखि नै सुस्त रहेको आर्थिक वृद्धिदरमा यसले कडा प्रहार गर्नेछ ।’

संस्थानले हाल यस वर्ष जर्मन अर्थतन्त्र ०.८ प्रतिशतले वृद्धि हुने अपेक्षा गरेको छ ।

इटाली, स्लोभाकिया र स्वीडेन लगायत महत्त्वपूर्ण अटोमोटिभ क्षेत्र भएका अन्य युरोपेली अर्थतन्त्रहरूले पनि ठूलो क्षति बेहोर्नुपर्ने सम्भावना रहेको उसले थपेको छ ।

जर्मन अर्थमन्त्रीका मुख्य सल्लाहकारले ट्रम्पप्रति सतर्क रहन सल्लाह दिएका छन् ।

जेन्स सुडेकमले रोयटर्सलाई भने, ‘ईयूले अहिलेका लागि केवल पर्ख र हेरको स्थितिमा बस्नुपर्छ । ट्रम्प आफ्ना ठूला भन्सार धम्कीहरू चाँडै स्थगित गर्न वा फिर्ता लिन माहिर छन् भन्ने कुरा सबैलाई थाहा छ ।’

सुडेकमले राष्ट्रपतिले ईयूले विद्यमान व्यापार सम्झौता पालना गरिरहेको छैन भन्ने किन सोच्छन् भन्ने कुरा स्पष्ट पार्नुपर्ने बताए । उनले पछिल्लो भन्सार धम्कीको कुनै कानुनी आधार छ कि छैन भन्ने कुरा पनि स्पष्ट नभएको थपे ।

‘यो सबै निकै आवेगात्मक देखिन्छ,’ सल्लाहकारले भने ।