काठमाडौं । निरन्तर बढिरहेको निष्क्रिय कर्जा केही नियन्त्रण भएर कर्जा नोक्सानी व्यवस्था घट्दा कुमारी बैंकको नाफामा उल्लेख्य वृद्धि भएको छ । कर्जा नोक्सानी व्यवस्थामा कमी तथा खुद ब्याज आम्दानी र फि तथा कमिसन आम्दानीमा उल्लेख्य बढेसँगै बैंकको नाफा आकर्षक रूपमा बढेको हो ।
पछिल्लो ३ आर्थिक वर्षदेखि लगातार दबाबमा देखिएको बैंकको वित्तीय अवस्था गत आर्थिक वर्षको अन्तिम त्रैमासदेखि क्रमिक रूपमा सुधार देखिँदै गएको छ।
चालु आर्थिक वर्ष २०८२/८३ को दोस्रो त्रैमाससम्म कुमारी बैंकले २ अर्ब ७२ करोड १ लाख रुपैयाँ खुद नाफा कमाएको हो । यो गत आर्थिक वर्षको सोही अवधिको तुलनामा ८८६.६२ प्रतिशत बढी (करिब १० गुणा) हो । गत आर्थिक वर्षको सोही अवधिसम्ममा बैंकले २७ करोड ५७ लाख रुपैयाँ खुद नाफा कमाएको थियो ।
बैंकको खुद ब्याज आम्दानी २७.६५ प्रतिशत बढेको छ । गत आवको सोही अवधिमा ५ अर्ब ३१ करोड ४० लाख रूपैयाँ रहेको बैंकको खुद ब्याज आम्दानी बढेर ६ अर्ब ७८ करोड ३५ लाख रूपैयाँ पुगेको हो । खुद फि तथा कमिसन आम्दानी २६.६५ प्रतिशत बढेर १ अर्ब ६० करोड ९२ लाख रूपैयाँ पुगेको छ ।
त्यस्तै, बैंकको कुल सञ्चालन आम्दानी ३०.०६ प्रतिशत बढेर ९ अर्ब २१ करोड २९ लाख रूपैयाँ पुगेको छ ।
यस अवधिमा बैंकको कर्जा नोक्सानी व्यवस्थामा छुट्याएको रकम ३ अर्ब २७ करोड ३१ लाख रुपैयाँबाट घटेर १ अर्ब ५० करोड ७५ लाख रुपैयाँ रहेको छ । सोही कारण बैंकको आम्दानीसँगै सञ्चालन मुनाफा र नाफा उल्लेख्य रूपमा बढेको हो । बैंकको सञ्चालन मुनाफा ५०५.११ प्रतिशत बढेर ४ अर्ब ३६ करोड ६५ लाख रूपैयाँ पुगेको छ ।
नाफा बढेसँगै बैंकको प्रतिसेयर आम्दानी बढेको छ । चालु आवको दोस्रो त्रैमासमा बैंकको प्रतिसेयर आम्दानी २० रुपैयाँ ७४ पैसा छ । गत आवको दोस्रो त्रैमासमा यस्तो आम्दानी २ रूपैयाँ १० पैसा थियो । पुस मसान्तसम्ममा बैंकको प्रतिसेयर नेटवर्थ १५१ रुपैयाँ १६ पैसा रहेको छ भने मूल्य आम्दानी अनुपात ८.६३ गुणा रहेको छ ।
चालु आर्थिक वर्षको ६ महिनामा वितरणायोग्य नाफा ८६ करोड २३ लाख रूपैयाँ छ । ब्याज बक्यौताका कारण बैंकले ७८ करोड १९ लाख रूपैयाँ नियामकीय जगेडा कोषमा जम्मा गरेको छ। बैंकको सञ्चित नोक्सानी गत असार मसान्तमा ३ अर्ब ८४ करोड ९५ लाख रुपैयाँ रहेकोमा पुस मसान्तमा आउँदा घटेर २ अर्ब ९८ करोड ७२ लाख रूपैयाँमा झरेको छ ।
२६ अर्ब २२ करोड ५९ लाख रुपैयाँ चुक्ता पुँजी रहेको बैंकको जगेडा कोषमा १६ अर्ब ४० करोड ५३ लाख रुपैयाँ छ । गत असार मसान्तमा ३ खर्ब ६४ अर्ब ६४ करोड रूपैयाँ रहेको बैंकको निक्षेप पुस मसान्तसम्ममा ३ खर्ब ७१ अर्ब ३८ करोड रुपैयाँ र कर्जा २ खर्ब ६० अर्ब ३२ करोड रूपैयाँबाट बढेर २ खर्ब ६५ अर्ब ९५ करोड रुपैयाँ पुगेको छ ।
बैंकको निष्क्रिय कर्जा गत आवको दोस्रो त्रैमासमा ६।९६ प्रतिशत रहेकोमा समीक्षा अवधिमा घटेर ६.९२ प्रतिशत कायम भएको छ । प्राथमिक पुँजीकोष अनुपात ७.२३ प्रतिशतबाट बढेर ८.९३ प्रतिशत पुग्दा आधार दर ५.६० प्रतिशत छ ।
प्रतिक्रिया