अमेरिकामा प्रवेश पाउन विदेशीले पाँच वर्षको सामाजिक सञ्जाल विवरण बुझाउनुपर्ने

एजेन्सी । अमेरिकाले विदेशी आगन्तुकहरूलाई देश प्रवेश गर्न विगत पाँच वर्षको सामाजिक सञ्जालको विवरण उपलब्ध गराउनुपर्ने प्रस्ताव गरेको छ ।

यसमा अस्ट्रेलिया, जर्मनी, जापान र बेलायत जस्ता देशहरू पनि समावेश छन् । त्यहाँका नागरिकहरूले हाल भिसा बिना नै अमेरिका प्रवेश पाउँछन् ।

बुधबार प्रकाशित होमल्यान्ड सिक्युरिटी विभागको सूचना अनुसार, अमेरिकी भन्सार तथा सीमा सुरक्षा (सीबीपी) ले भिसा वेभर प्रोग्राम अन्तर्गत अमेरिका प्रवेश गर्ने यात्रुहरूको जाँच प्रक्रियाको एक भागको रूपमा सामाजिक सञ्जाललाई अनिवार्य डेटा तत्त्वको रूपमा थपिरहेको छ । यस प्रस्तावमाथि राय सुझावका लागि ६० दिनको समय दिइएको छ ।

यो नियम करिब ४० देशका यात्रुहरूमा लागू हुनेछ । ती देशका नागरिक भिसा बिना ९० दिनसम्म अमेरिकामा बस्न सक्छन् र तिनलाई यात्रा अघि ईएसटीए भनिने विद्युतीय प्रणाली मार्फत जाँच गरिन्छ ।

यो योजना ट्रम्प प्रशासनले प्रवेशमा कडाइ गर्ने उद्देश्यले ल्याएका शृंखलाबद्ध उपायहरूमध्ये पछिल्लो हो । यसमा वाशिङटनमा दुई नेशनल गार्ड सदस्यहरूमाथि गोली प्रहार भएपछि यो महिना घोषणा गरिएको करिब ३० देशहरूमाथिको नियोजित यात्रा प्रतिबन्ध पनि समावेश छ ।

संघीय अधिकारीहरूले गोली प्रहार गर्ने व्यक्ति अफगानी नागरिकको भएको बताएका छन् । तिनले सन् २०२१ मा अमेरिका आउनुअघि अफगानिस्तानमा अमेरिकी सेना र सीआईएसँग काम गरेका थिए ।

राष्ट्रपति डोनल्ड ट्रम्प र उनका सहयोगीहरूले ती अफगान नागरिकलाई देश भित्रिन अनुमति दिएको भन्दै बाइडन प्रशासनलाई दोष दिएका छन् र आप्रवासीहरूमाथि कडा सीमा तोक्न दबाब दिइरहेका छन् ।

गोलीकाण्डपछि सामाजिक सञ्जालमा एक पोस्ट गर्दै ट्रम्पले सबै तेस्रो विश्वका देशहरूबाट हुने आप्रवासनलाई स्थायी रूपमा रोक्न कदम चाल्ने बताएका थिए ।

यूएस सिटिजनशिप एन्ड इमिग्रेशन सर्भिसेजले एक नीतिगत मेमोमा जनाएअनुसार, अमेरिकाले सन् २०२१ मा राष्ट्रपति जो बाइडनको कार्यकाल सुरु भएयता वा त्यसपछि प्रवेश गरेका ती राष्ट्रका मानिसहरूलाई दिइएको स्वीकृतिको व्यापक पुनरवलोकन पनि थाल्नेछ ।

विदेश मन्त्रालयले डिसेम्बर महिनामा उच्च दक्ष कामदारहरूका लागि एच–१बी भिसामा सामाजिक सञ्जाल समीक्षाको आवश्यकता विस्तार गर्ने बताएको थियो । यसले निवेदकहरू र उनीहरूका आश्रितहरूलाई आफ्ना सबै सामाजिक सञ्जाल प्रोफाइलहरूको गोपनीयता सेटिङहरू सार्वजनिक बनाउन आग्रह गरेको थियो ।

जुन महिनामा यसले विद्यार्थी भिसा निवेदकहरूको सामाजिक सञ्जाल स्थितिको समीक्षा गर्न आदेश दिएको थियो ।

यो वर्ष अमेरिकामा विदेशी आगन्तुक र पर्यटकहरूले गर्ने खर्चमा तीव्र गिरावट आउने संकेत देखिएको छ । मे महिनाको तथ्यांकले सन् २०२५ मा अमेरिकाले राजस्वमा १२.५ अर्ब डलर गुमाउने देखाएको छ भने वर्षको अन्त्यसम्ममा आगन्तुक खर्च १६९ अर्ब डलरभन्दा तल झर्ने अनुमान गरिएको छ ।

यूएस ट्राभल एसोसिएसनका अनुसार, करिब पाँच वर्षमा पहिलोपटक अमेरिकामा विदेशी पर्यटकहरूको संख्यामा गिरावट आउने देखिएको छ । सन् २०२४ मा ७ करोड २४ लाख रहेको पर्यटक संख्या घटेर यस वर्ष ६ करोड ७९ लाख हुने प्रक्षेपण गरिएको छ ।

वर्ल्ड ट्राभल एन्ड टुरिजम काउन्सिल र अक्सफोर्ड इकोनोमिक्सले मे महिनामा गरेको अध्ययन अनुसार, विश्लेषण गरिएका १८४ विश्वव्यापी अर्थतन्त्रहरूमध्ये अमेरिका मात्र यस्तो देश हो जहाँ यो वर्ष पर्यटन आम्दानी गुम्ने प्रक्षेपण गरिएको छ ।

यो गिरावटको कारण कोभिडकालीन यात्रा नियमहरूको प्रभाव बाँकी रहनु, डलर बलियो हुनु र ट्रम्प प्रशासनको अमेरिका फर्स्टको नारा र नीतिका कारण मानिसहरूको अमेरिकाप्रतिको दृष्टिकोणमा आएको परिवर्तनलाई मानिएको छ ।