काठमाडौं । स्वदेशी उत्पादन तथा सेवाहरुको प्रवद्र्धन र व्यापार गर्ने उद्देश्यले बिहिबारदेखि तीनदिने बृहत् प्रदर्शनी आयोजना सुरु भएको छ ।
मेलामा स्वदेशी उत्पादन र सेवाका साथै पश्मिना इन्टरनेशनल एक्स्पोको पनि आयोजना गरिएको छ । मेलालाई नेपाल पश्मिना उद्योग संघले आयोजना गरेको हो ।
मेलामा १५० भन्दा बढी स्वदेशी स्टलहरु रहने नेपाल पश्मिना उद्योग संघका अध्यक्ष धनप्रसाद लामिछानेले जानकारी दिए । मेलामा ४० भन्दा बढी शुद्ध नेपाली पश्मिनाका स्टलहरु, च्याङ्ग्रादेखि पश्मिनासम्मको प्रत्यक्ष निर्माण प्रक्रिया, स्वदेशी लुगा तथा पश्मिनाको फेशन शो र नेपाली रैथाने खानाका परिकारहरु रहने उनले बताए ।
मुस्ताङबाट च्याङ्ग्रा ल्याएर फाम टू फाइबर कसरी तयार हुन्छ, फाइबर टू फेसन देखाउने उनको भनाइ छ । पश्मिना मेला नेपालमा पहिलो पटक आयोजना हुन लागेको हो । मेलामा ५० हजार भन्दा बढीले अवलोकन गर्ने आयोजकले अपेक्षा गरिएको छ ।
नेपाल उद्योग परिसंघ (सिएनआई) मेलाको सहआयोजकका रुपमा रहेको छ । मेलालाई उद्योग तथा वाणिज्य मन्त्रालय र व्यापार तथा निकासी प्रवद्र्धन केन्द्रले प्रवद्र्धन गरेका छन् ।
व्यापार तथा निकासी प्रवद्र्धन केन्द्रका कार्यकारी निर्देशक शरद विक्रम राणाले नेपाली पश्मिना पुरानो र नेपाली सीपमा आधारित भए पनि प्रचारप्रसार र व्यापार हुन नसकिरहेकोले यसको प्रवद्र्धन गर्नुपर्छ भनेर नै केन्द्रले मेलामा चासो राखेको बताए ।
स्वदेशी उद्योगलाई बचाउँने, प्रवद्र्धन गर्ने लक्ष्यमा यो मेलाले सहयोग गर्ने नेपाल उद्योग परिसंघका महानिर्देशक डा. घनश्याम ओझाको भनाइ छ । स्वदेशी उत्पादन र उद्योगलाई प्रोत्साहन गर्नुपर्न यो मेलाले सहयोग गर्ने उनले बताए ।
प्रतिक्रिया