बागलुङको निसीखोलामा बस दुर्घटना, ४ जना गम्भिर घाइते

काठमाडौं । रुकुमबाट काठमाडौं आउँदै गरेको बस बागलुङमा दुर्घटना भएको छ ।

बुधबार दिउँसो ना ८ ख ८४१४ नम्बरको बस बागलुङको निसीखोलामा दुर्घटना भएको बागलुङ जिल्ला सहायक प्रमुख जिल्ला अधिकारी पुष्पराज पौडेलले क्लिकमान्डुलाई जानकारी दिए ।

निसीखोला गाउँपालिकाका सूचना अधिकारी डिलाराम बाँठा मगरकाअनुसार उक्त बसमा चालकसहित ४४ जना सवार थिए । सवार यात्रुहरुमध्ये २२ जना घाइते भएको र त्यसमा पनि चार जना भने गम्भिर घाइते रहेको मगरले क्लिकमान्डुलाई बताए ।

दुर्घटनामा घाइते यात्रुहरुलाई बागलुङको जिल्ला अस्पतालमा उपचार गरिएको छ । मगरका अनुसार स्थानीय र प्रहरीले संयुक्त रुपमा घाइतेको उद्धार गरिरहेका छन् ।