चाडपर्व नजिकिएसँगै मोटरसाइकल र स्कुटरमा अफरै अफर

काठमाडौं । दशैं र तिहार जस्ता चाडपर्व नजिकिएसँगै ग्राहक आकर्षित गर्न मोटरसाइकल र स्कुटर बिक्रेता कम्पनीहरुले विभिन्न योजनाहरु सार्वजनिक गर्न थालेका छन् ।

विगतका वर्षहरुमा जस्तै यस वर्ष पनि कम्पनीहरुले ग्राहक लोभ्याउनका लागि अधिकतम १० लाख रुपैयाँसम्मको अफर सार्वजनिक गरेका छन् । विशेष गरी हरेक वर्ष दशैं र तिहारलाई लक्षित गरी कम्पनीले विभिन्न उपहारदेखि छुट अफरहरु सार्वजनिक गर्छन् । जसलाई यस वर्षपछि कम्पनीहरुले निरन्तरता दिएका छन् ।

अझ कोरोना महामारीका कारण सार्वजनिक यातायातको साटो निजी सवारी प्रयोग गर्नुपर्ने बाध्यताका कारण मोटरसाइकल र स्कुटरमा मानिसहरुको आकर्षण बढ्दै गएको समेत पाइन्छ । यही आधारमा कम्पनीहरुले विभिन्न अफरहरु सार्वजनिक गरेका छन् ।

हालसम्म हिरो, बजाज, सुजुकी, यामाहा, टिभीएस ब्राण्डका मोटरसाइकल र स्कुटर बिक्री गर्ने कम्पनीहरुले दशैं योजना सार्वजनिक गरिसकेका छन् ।

कुन कम्पनीको कस्तो अफर ?
बजाज: दशैंको अवसरमा बजाज मोटरसाइकलको एकमात्र आधिकारिक वितरक हंसराज हुलासचन्द एण्ड कम्पनी ‘बजाज खुसीको ३ डोज’ योजना सार्वजनिक गरेको छ ।

यस अभियान अन्तर्गत ग्राहकले कुनै पनि बजाज मोटरसाइकल किन्नुभन्दा पहिले, किन्ने समयमा र किनिसकेपछि नगद पुरस्कार प्राप्त गर्न सक्नेछन् ।

जसमा ग्राहकहरुले बाइक किन्नु भन्दा पहिले १० हजार रुपैयाँसम्म अग्रीम नगद, मोटरसाइकलको खरिदको समयमा १ लाख रुपैयाँसम्म नगद तथा बम्पर अफर अन्तर्गत कुनै पनि अधिकृत डिलरबाट बजाज मोटरसाइकल किनिसकेपछि १० लाख रुपैयाँको नगद पुरस्कार प्राप्त गर्न सक्नेछन् ।

सुजुकी: सुजुकी कम्पनीको मोटरसाईकल तथा स्कुटरको नेपालका लागि आधिकारिक बिक्रेता भीजी अटोमोबाइल्स प्रालिले ‘दशैं आयो उमंग छायो’ योजना सार्वजनिक गरेको छ । कम्पनीले दशैंतिहार तथा छठ पर्वलाई लक्षित गरी आफ्ना ग्राहकहरूलाई स्कुटरको खरिदमा १० हजार नगद छुट दिने भएको छ ।

साथै कम्पनीले १ वर्षको सडक दस्तुर छुट, एक्सचेञ्ज, सरल फाइनान्सको सुबिधाका साथै प्रत्येक १५ दिनमा बम्पर उपहारस्वरुप इन्ट्रडर बाइक जित्न सकिनेछ ।

हिरो: नेपालका लागि हिरो मोटरसाइकलको आधिकारिक बिक्रेता नेपाल जनरल मार्केटिङ प्रालिले दशैंलाई लक्षित गरी ‘दशैंको बेला हिरोको मेला’ नामक योजना सार्वजनिक गरेको छ ।

जस अन्तर्गत हिरो मोटरसाइकल तथा स्कुटर किन्ने ग्राहकले नगद छुट पाउने छन् । जसमा स्क्रयाचमार्फत् न्यूनतम ६ हजार रुपैयाँ र अधिकतम १ लाख रुपैयाँसम्म छुट पाउनेछन् । साथै बम्पर लक्की ड्रमार्फत् एकजनाले १ लाख रुपैयाँसम्म नगद पाउनेछन् ।

सबै साथै हिरोको मोटरसाइकल र स्कुटरमा शुन्य प्रतिशत ब्याजदरमा ५० प्रतिशत फाइनान्सको समेत सुविधा उपलब्ध रहेको छ ।

टिभीएस: दशैं, तिहार र छठ पर्वलाई लक्षित गरी टीभीएसको आधिकारिक बिक्रेता जगदम्बा मोटर्सले ‘टीभीएसः ६ प्राइजको सप्राइज’ योजना सार्वजनिक गरेको छ ।

यो अफर अन्तर्गत ग्राहकले ६ पटकसम्म उपहार जित्न सक्नेछन् । साथै, विभिन्न टीभीएस ब्राण्डका मोटरसाइकल र स्कुटरको खरिदमा हात खाली नहुने गरी विभिन्न आकर्षक तथा भव्य उपहारहरु प्राप्त गर्न सक्ने कम्पनीको भनाइ छ ।

यो योजना गत भदौ १६ गते बुधबारदेखि शुरू भइ चाडपर्व समापनपछि मात्रै समाप्त हुनेछ । यस योजना मुलुकभरका सम्पूर्ण टीभीएस शोरुममा उपलब्ध हुनेछ ।

यस योजना अन्तर्गत ग्राहकले मोटरसाइकल वा स्कुटर खरिद नै नगरी कम्पनीको वेवसाइट टीभीएसनेपाल डट कम÷दशैं मा गएर १ लाख रुपैयाँसम्म जित्न सक्नेछन् भने सवारी खरिद गर्दा १० लाख रुपैयाँसम्म नगद हात पार्न सक्नेछन् । त्यसका साथै दैनिक रियलमी सी२० स्मार्टफोन पनि ग्राहकले जित्न सक्नेछन् ।

यस योजना अन्तर्गत ग्राहकले हरेक साता शतप्रतिशत क्यासब्याकको अफर पाउनेछन् । जसमा ग्राहकले सवारी खरिद गर्दा बुझाएको सम्पूर्ण रकम फिर्ता पाउनेछन् भने हरेक महिना टीभीएस अपाचे आरआर ३१० पाउन सक्नेछन् ।

त्यसका साथै बम्पर उपहार अन्तर्गत टीभीएसको सवारीसँगै अन्तिममा प्रोटोन सागा कार जित्न सक्नेछन् । साथै सोधपुछमार्फत् रियलमी स्मार्ट फोन र अपाचे आरआर ३१० बाइक जित्न सक्नेछन् ।

यामाहा: यामाहा मोटर साइकल तथा स्कूटरहरूको आधिकारिक वितरक एमएडब्लु इन्टरप्राइजेजले दशैं तिहार अफर सार्वजनिक गरेको छ । कम्पनीले दशैं तिहारको शुभकामना सहित एक विशेष उपभोक्ता योजना ‘रेस फर द एस अफर’ शुरु गरेको हो ।

योजना अन्तर्गत उपभोक्ताहरूले यामाहा खरिद गर्दा तत्कालै स्योर सट उपहारमा ८ हजार रुपैयाँदेखि १ लाख रुपैयाँसम्मको नगद पुरस्कार छुट प्राप्तगर्न सक्नु हुनेछ । साथै लक्की ड्रमा हरेक हप्ता एक जनाले ४ तोला सुनको एक्कातास जित्नेछ ।

कम्पनीले विजेता उपभोक्ताले लक्की ड्रको भन्दा ३ गुणा ज्यादा अर्थात् १२ तोला सुनको एक्कातास जितेर रेस फर द एसको सर्वाधिक भाग्यशाली विजेताको ताज पहिरिन सक्नेछन् ।