मेस्सीले आफ्नो अन्तिम विश्वकप खेलिसकेका हुन् कि बाँकी छ ?

एजेन्सी । न्युयोर्क न्युजर्सी स्टेडियममा भएको अतिरिक्त समयको खेलमा अर्जेन्टिना स्पेनसँग १-० ले पराजित भएसँगै लियोनेल मेस्सीको २०२६ को विश्वकप यात्रा समाप्त भएको छ ।

हाल ३९ वर्ष पुगेका मेस्सीले यो नै आफ्नो अन्तिम विश्वकप खेल हो वा होइन भन्नेबारे कुनै घोषणा गरेका छैनन् । तर उनको उमेरलाई हेर्दा, अबको चार वर्षपछि हुने २०३० को विश्वकप खेल्ने सम्भावना निकै कम देखिन्छ ।

यद्यपि, मेस्सीका लागि यो प्रतियोगिता अविश्वसनीय रह्यो ।

अर्जेन्टिनालाई लगातार चौथो ठूलो अन्तर्राष्ट्रिय ट्रफी दिलाउने लक्ष्यका साथ मैदानमा उत्रिएका उनले प्रतियोगिताभर आठ गोल र चार असिस्ट गर्दै टोलीको पूर्ण नेतृत्व गरे ।

अतिरिक्त समयको एक गोलले अन्ततः अर्जेन्टिनालाई त्यो ऐतिहासिक उपलब्धि हासिल गर्नबाट रोक्यो, तर प्रतियोगिताभरि मेस्सीको प्रदर्शनमा उमेरको कुनै छाप देखिएन ।

३९ वर्षको उमेरमा पनि उनी २९ वर्षको युवा जस्तै देखिए; उनले उत्कृष्ट स्तरको खेल प्रदर्शन गरे र केही महत्त्वपूर्ण मोडहरूमा अर्जेन्टिनाका लागि संकटमोचक बने ।

इजिप्टविरुद्धको ‘राउन्ड अफ १६’ को खेलमा अर्जेन्टिना २-० ले पछि परेको अवस्थामा उनले उत्कृष्ट पुनरागमन गराउँदै खेल आफ्नो नियन्त्रणमा लिए । सेमिफाइनलमा इंग्ल्यान्डविरुद्ध पनि उनले त्यस्तै जादु देखाए, जहाँ उनले खेलको अन्तिम समयतिर दुईवटा गोलमा असिस्ट गर्दै अर्जेन्टिनालाई फाइनलसम्म पुऱ्याए ।

यदि मेस्सीलाई २०३० को विश्वकपसम्म खेल्न प्रेरित गर्ने कुनै एउटा कारण छ भने, त्यो अर्जेन्टिनामा आयोजना हुने शताब्दी उत्सवको खेल हुन सक्छ । २०३० को विश्वकप मुख्यतया स्पेन, पोर्चुगल र मोरक्कोले संयुक्त रूपमा आयोजना गर्नेछन्, जसमा पहिलो विश्वकपको १०० वर्ष पुगेको अवसरमा अर्जेन्टिना, उरुग्वे र पराग्वेले एक-एक खेल आयोजना गर्ने तय भएको छ ।

ईएसपीएनले भने लेखेको छ, ‘मेस्सीले पहिले नै यो आफ्नो अन्तिम विश्वकप भनिसकेका थिए र म्याचपछि उनी भावुक भई रोए, जसले यो साँच्चै उनको अर्जेन्टिना जर्सीमा अन्तिम खेल हुनसक्ने संकेत गरेको छ। यद्यपि कोच स्कालोनीका अनुसार २०२८ को कोपा अमेरिकामा खेल्ने सम्भावना अझै बाँकी छ।’

यसले मेस्सीलाई अर्जेन्टिनी माटोमा विश्वकपको खेल खेल्ने एक अन्तिम मौका दिन सक्छ । त्यो सम्भव होस् वा नहोस्, २०२६ को विश्वकप मेस्सीको महानताको अर्को एउटा बलियो प्रमाण बनेको छ । ३९ वर्षको उमेरमा पनि उनी अन्तिम समयसम्म अर्जेन्टिनाका नेता, सिर्जनशील खेलाडी र जादुको मुख्य स्रोतका रूपमा मैदानमा छाइरहे ।

फाइनलमा सम्झन लायक प्रदर्शन गरेका मेस्सीलाई ईएसपीएनले २०२६ विश्वकपको अन्तिम खेलका लागि मेस्सीलाई १० मध्ये ३ अंक मात्र दिएको छ ।

स्पेनले मेस्सीलाई पूरा म्याचभर लगभग निष्क्रिय बनाइदियो । अन्तिम क्षणसम्म उनलाई खेलबाट पूरै बाहिर राखियो र अर्जेन्टिना जब दस खेलाडीमा झर्यो अनि हारको मुखमा पुग्यो तबमात्र आक्रमणतर्फ धकेलिन बाध्य भयो । त्यसअघि, स्पेनले बल कब्जामा राख्दै र बल गुमाउने बित्तिकै तुरुन्त प्रेस गर्दै अर्जेन्टिनालाई गल्ती गर्न बाध्य पार्दै रक्षात्मक क्षेत्रमै थुनेको थियो ।