उत्कृष्ट प्रदर्शनका कारण अमेरिकी कम्पनीहरूमाझ चिनियाँ एआई मोडलको लोकप्रियता बढ्दो

एजेन्सी । चिनियाँ एआई मोडलहरू अमेरिकी कम्पनीहरूमाझ लोकप्रिय बन्दै गएका छन् किनकि उनीहरूले प्रमुख अमेरिकी प्रतिस्पर्धीहरूसँगको प्रदर्शनको अन्तर घटाउँदै लगेका छन् र प्रयोगका लागि निकै सस्तो पनि छन् ।

डीपसीक र जेड.एआई जस्ता चिनियाँ कम्पनीहरूले हालै सार्वजनिक गरेका मोडलहरूलाई एन्थ्रोपिक र ओपनएआईका अत्याधुनिक प्रणालीहरूसँग उच्च प्रतिस्पर्धा गर्न सक्ने रूपमा हेरिएको छ ।

धेरै अमेरिकी एआई ल्याबहरूमा उन्नत मोडलहरूको टोकन मूल्य बढिरहेका बेला चिनियाँ मोडलहरूको क्षमतामा यस्तो प्रगति भएको हो जसले गर्दा अमेरिकी कम्पनीहरू यो प्रविधि प्रयोग गर्दा लाग्ने अप्रत्याशित उच्च लागतसँग जुधिरहेका छन् ।

विभिन्न एआई मोडलहरूमा पहुँच दिने ओपनराउटर प्लेटफर्ममार्फत चिनियाँ एआई मोडलहरूमा अमेरिकी कम्पनीहरूले प्रयोग गर्ने टोकनको हिस्सा फेब्रुअरी ८ देखि प्रत्येक हप्ता ३० प्रतिशतभन्दा माथि रहेको छ जुन बढेर ४६ प्रतिशतसम्म पुगेको छ ।

अघिल्लो १२ महिनाको औसत हिस्सा मात्र ११ प्रतिशत थियो भने सन् २०२५ को पहिलो ६ महिनामा यो ४.५ प्रतिशतमा झरेको थियो । चिनियाँ ओपन सोर्स र ओपन वेट मोडलहरूको प्रयोग बढिरहेका बेला अमेरिकी प्रशासनले आफ्ना सबैभन्दा शक्तिशाली एआई मोडलहरूलाई नियमन गर्ने र विदेशबाट आउने विकल्पहरूको तीव्र विस्तारलाई कसरी रोक्ने भन्ने विषयमा विचार गरिरहेको छ ।

जुन महिनाको अन्त्यमा ओपनएआईले सरकारको अनुरोधमा नयाँ मोडलहरूको विस्तारलाई सीमित गर्ने बताएको थियो । सोही महिनामा ट्रम्प प्रशासन र एन्थ्रोपिक कम्पनीबीचको तनावपूर्ण स्थितिपछि एन्थ्रोपिकका मिभोस र फ्याबल मोडलहरूमा लगाइएको निर्यात प्रतिबन्ध फुकुवा गरिएको थियो ।

थिंकट्यांक ब्रुकिङ्सको जोन एल. थोर्नटन चाइना सेन्टरका फेलो काइल च्यानले सीएनबीसीलाई भनेका छन्, ‘एआईको लागत आकासिएको अवस्थामा चिनियाँ एआई मोडलहरू अहिले अमेरिकी कम्पनीहरूका लागि विशेष रूपमा आकर्षक बनेका छन् । पहिले अमेरिकी कम्पनीहरूले मोडललाई वास्ता नगरी एआई अपनाउन प्राथमिकता दिन्थे भने अहिले उनीहरू लागतप्रति बढी सचेत हुन थालेका छन् ।’

कम्पनीहरूले नयाँ उत्पादनहरू बनाउन र आन्तरिक कार्यक्षमता बढाउन एआई मोडलहरू प्रयोग गर्न खोजिरहेका बेला इन्जिनियरहरूले सस्तो ओपन सोर्स र ओपन वेट मोडलहरूसँग परीक्षण गरिरहेका छन् । त्यसमा सबैभन्दा सक्षम मोडलहरू चिनियाँ कम्पनीहरूले बनाएका छन् ।

ओपन सोर्स र ओपन वेट मोडलहरूले एआई मोडलका विभिन्न पाटाहरू विकासकर्ताहरूका लागि हेर्न, प्रयोग गर्न र कहिलेकाहीँ परिमार्जन गर्न उपलब्ध गराउँछन् । यी मोडलहरू ओपनएआई, एन्थ्रोपिक र गुगलद्वारा उत्पादित क्लोज्ड सिस्टम मोडलहरूभन्दा फरक हुन्छन् जसको कोड र भित्री कार्यप्रणाली गोप्य राखिन्छ ।

जुन महिनामा एआई स्टार्टअप लिन्डीले आफ्नो सबै ट्राफिक एन्थ्रोपिकको क्लाउड मोडलबाट हटाएर चिनियाँ कम्पनी डीपसीकमा सारेको छ । डीपसीकले सन् २०२५ को सुरुमा धमाका मच्चाउँदै प्रवेश गरेको थियो र अप्रिलमा नयाँ मोडल सार्वजनिक गरेको थियो ।

लिन्डीका सीईओ फ्लो क्रिभेलोले सीएनबीसीसँग भने, ‘हामीले यो कदम चाल्यौं र तपाईंले लागतको ग्राफ नाटकीय रूपमा घटेको देख्न सक्नुहुन्छ ।’ उनले यस निर्णयले केही महिनाभित्रै लिन्डीको लाखौं डलर बचत हुने बताए ।

विकासकर्ताहरूलाई एप र वेबसाइटहरू सञ्चालन गर्न दिने प्लेटफर्म भर्सलमा मे र जुन महिनाको बीचमा डीपसीकको टोकन हिस्सा बढेको देखिएको छ । भर्सलमा एजेन्टिक इन्फ्रास्ट्रक्चर प्रमुख हरप्रीत अरोराले सीएनबीसीलाई बताएअनुसार, जेड.एआईको जीएलएम ५.२ जुनमा भव्य रूपमा सार्वजनिक गरियो र यसले सन् २०२६ मा भर्सलले ट्य्राक गरेका मोडलहरूमध्ये सबैभन्दा तीव्र गतिमा लोकप्रियता पाएको छ ।

सार्वजनिक भएको पहिलो हप्तामै दैनिक टोकन परिमाण करिब २७ गुणाले बढ्यो र यसलाई प्रयोग गर्ने ग्राहकहरूको संख्या करिब ८० गुणाले वृद्धि भयो ।

अरोराले थपे, ‘यहाँ मूल्यले ठूलो भूमिका खेलिरहेको छ । जब कुनै कामको लागि उत्कृष्ट मोडल चाहिँदैन, तब टोलीहरूले सो कामका लागि पर्याप्त हुने सबैभन्दा सस्तो मोडल रोज्न थालेका छन् र चीनबाट आएका हालका मोडलहरूले यो प्रतिस्पर्धा जितिरहेका छन् ।’

ओपनराउटरका डेटा एन्ड एनालिटिक्स कर्मचारी जस्टिन समरभिलले सीएनबीसीलाई बताएअनुसार, चिनियाँ ओपन सोर्स मोडलहरू प्रमुख एन्थ्रोपिक र ओपनएआई मोडलहरूभन्दा ६० देखि ९० प्रतिशतसम्म सस्तो हुन सक्छन् । यस विषयमा ओपनएआई र एन्थ्रोपिकसँग प्रतिक्रिया मागिएको छ ।

नियमित उद्योगहरूका लागि एआई एजेन्ट प्लेटफर्म लन्चलेमोनेडमा अझै पनि क्लाउड र च्याटजीपीटीको वर्चस्व रहे पनि जीएलएम ५.२ अहिले यस प्लेटफर्मको शीर्ष पाँच मोडलभित्र पर्न सफल भएको लन्चलेमोनेडका सीईओ र संस्थापक सिएन सोलोनले सीएनबीसीलाई बताए ।

सिएनले भने, ‘जेड.एआई र अलिबाबाको क्युएन जस्ता चिनियाँ मोडलहरू कम्पनीहरूका लागि उत्कृष्ट विकल्प बनिरहेका छन् किनकि उनीहरूले विशिष्ट कामहरूका लागि प्रदर्शन र लागतको आकर्षक संयोजन प्रदान गर्छन् । एआई रणनीतिमा परिपक्व भएका व्यवसायहरू प्राविधिक वा व्यावसायिक रूपमा फाइदा हुने ठाउँमा यी मोडलहरू प्रयोग गर्न झन् बढी इच्छुक देखिन थालेका छन् ।’

चिनियाँ एआई मोडलहरूको प्रदर्शन पनि वृद्धि भइरहेको छ । अमेरिकी प्रतिस्पर्धीहरूको तुलनामा निकै सस्तो भए पनि यिनीहरूले प्रमुख अमेरिकी मोडलहरूकै हाराहारीमा काम गरिरहेको ब्रुकिङ्सका च्यानले बताए । उनका अनुसार, चिनियाँ मोडलहरू हाल शीर्ष अमेरिकी प्रतिस्पर्धीहरूभन्दा करिब ६ देखि ९ महिना मात्र पछि छन् ।

समरभिलका अनुसार, नयाँ ओपन सोर्स मोडलहरूले राम्रो प्रदर्शन गरिरहेका छन् र सबैभन्दा जटिल एलएलएम कार्यहरूबाहेक अन्य कामका लागि सक्षम देखिएका छन् ।

एउटा महत्त्वपूर्ण एजेन्टिक बेन्चमार्कमा जीएलएम ५.२ एन्थ्रोपिकको ओपस ४.८ भन्दा मात्र १ प्रतिशतले पछि रह्यो जबकि यसको लागत ओपसको तुलनामा करिब पाँच गुणा कम थियो । केही अनुसन्धाताहरूले केही साइबर बेन्चमार्कहरूमा जीएलएम ५.२ ले शीर्ष अमेरिकी ल्याबहरू सरह प्रदर्शन गर्न सक्ने बताएका छन् ।

लिन्डीका क्रिभेलोले एक्समा पोस्ट गर्दै डीपसीक भी४ मा सर्नाले लिन्डीका धेरै प्रमुख कार्यहरूमा प्रदर्शन वृद्धि भएको बताएका छन् ।

हगिङ फेसका मशिन लर्निङ प्रमुख यासिन जर्नाइटले सीएनबीसीलाई भनेका छन्, ‘हामीले कम्पनीहरू आफूले नियन्त्रण र अनुकूलन गर्न सक्ने सस्तो एआई प्रणालीतर्फ आकर्षित भएको देखिरहेका छौं र वर्तमानको ओपन सोर्स र ओपन वेट मोडलहरूको अवस्था हेर्दा यसको अर्थ चिनियाँ विकल्पहरूको प्रयोग गर्नु नै हो ।’

उनले थपे, ‘प्रयोगकर्ताहरूका लागि एउटा वास्तविक जोखिम के छ भने उनीहरू प्रदर्शनमा राम्रो तर महँगो अमेरिकी मोडल (जसको मूल्य र उपलब्धता छिट्टै परिवर्तन हुन सक्छ) वा लागत नियन्त्रण गर्न र आफ्नै एआई प्रणाली राख्नका लागि एकमात्र व्यावहारिक विकल्पको रूपमा चिनियाँ मोडलहरू रोज्नुपर्ने स्थितिमा अड्किन सक्छन् ।’