विश्वकपमा तेस्रो स्थानको दौड रोचक: कुन-कुन टोली पुग्लान् अन्तिम ३२ मा ?

एजेन्सी । विश्वकपको समूह चरण अन्तिम चरणमा प्रवेश गरिसकेको छ र अब नकआउट चरण पुग्ने टोलीहरूको चित्र क्रमशः स्पष्ट हुँदै गएको छ ।

यसपटक ४८ टोली सहभागी भएकाले समूह चरणपछि १६ टोली बाहिरिनेछन् भने ३२ टोली अन्तिम ३२ मा प्रवेश गर्नेछन् ।

प्रत्येक समूहका शीर्ष दुई टोली सीधै नकआउट चरणमा पुग्नेछन् भने बाँकी स्थान १२ समूहका तेस्रो स्थानमा रहेका टोलीमध्ये उत्कृष्ट आठ टोलीले प्राप्त गर्नेछन् ।

बराबरी अंक भएको अवस्थामा पहिलो आधार आपसी खेलको नतिजा हुनेछ । त्यसपछि गोल अन्तर, गोल संख्या, फिफाको अनुशासन अंक (कार्डका आधारमा) र अन्तिममा फिफा वरीयता प्रयोग गरिनेछ ।

सह–आयोजक मेक्सिको समूह ‘ए’ मा तीनवटै खेल जितेर नकआउट चरणमा पुग्ने पहिलो टोली बन्यो । दक्षिण अफ्रिकाले दक्षिण कोरियालाई १–० ले हराउँदै इतिहासमै पहिलोपटक नकआउट चरणमा स्थान बनायो । दक्षिण कोरिया भने तीन अंकसहित तेस्रो स्थानमा रहेर उत्कृष्ट तेस्रो टोलीको सूचीमा पर्ने आशामा छ ।

समूह ‘बी’ मा स्विट्जरल्यान्डले क्यानडालाई २–१ ले हराएर सात अंकसहित शीर्ष स्थान कब्जा गर्यो । क्यानडा उपविजेता बन्यो भने बोस्निया–हर्जेगोभिना चार अंकसहित तेस्रो स्थानमा रहे पनि उत्कृष्ट तेस्रो टोलीमध्ये पर्ने निश्चित भइसकेको छ ।

समूह ‘सी’ मा पाँच पटकको विश्व च्याम्पियन ब्राजिलले स्कटल्यान्डलाई ३–० ले पराजित गर्दै सात अंकसहित समूह विजेता बन्यो । मोरक्कोले हाइटीलाई ४–२ ले हराउँदै दोस्रो स्थान सुरक्षित गर्यो । स्कटल्यान्ड तीन अंक र माइनस तीन गोल अन्तरसहित तेस्रो स्थानमा रहँदा नकआउट पुग्ने सम्भावना निकै कमजोर बनेको छ । हाइटी भने अंकविहीन रहँदै बाहिरिएको छ ।

समूह ‘डी’ मा अमेरिकाले समूह विजेता बन्दै नकआउट चरण सुनिश्चित गरिसकेको छ । अष्ट्रेलिया र पाराग्वेबीच दोस्रो स्थानको प्रतिस्पर्धा जारी छ । अष्ट्रेलियालाई बराबरी पर्याप्त हुनेछ भने पाराग्वेलाई जित आवश्यक छ ।

समूह ‘ई’ मा जर्मनीले समूह जितिसकेको छ । आइभरी कोस्टलाई दोस्रो स्थान सुरक्षित गर्न बराबरी पर्याप्त हुनेछ । इक्वेडर र कुरासाओ अझै दौडमा छन् र अन्तिम खेलले स्थिति निर्धारण गर्नेछ ।

समूह ‘एफ’ मा नेदरल्यान्ड्स शीर्ष दुईमा रहने पक्का भइसकेको छ । जापानलाई स्वतः छनोटका लागि कम्तीमा एक अंक चाहिन्छ । स्विडेनले जित निकाले मात्र शीर्ष दुईमा पुग्ने सम्भावना जीवित रहनेछ ।

समूह ‘जी’ मा इजिप्ट अग्रस्थानमा छ र इरानविरुद्ध हार टारेमा नकआउट पुग्नेछ । बेल्जियमलाई भने न्यूजिल्यान्डविरुद्ध जित आवश्यक छ । इरानले इजिप्टलाई हराए स्वतः अगाडि बढ्नेछ ।

समूह ‘एच’ मा स्पेनलाई नकआउट चरण पुग्न बराबरी पर्याप्त हुनेछ । उरुग्वे, केप भर्डे र साउदी अरेबिया पनि प्रतिस्पर्धामा छन् र अन्तिम खेलपछि मात्र स्पष्ट हुनेछ ।

समूह ‘आई’ मा फ्रान्स र नर्वे दुवै नकआउट चरणमा पुगिसकेका छन् । अब उनीहरूबीच समूह विजेताको टुंगो लाग्नेछ । सेनेगल र इराकले भने उत्कृष्ट तेस्रो टोलीको आशा राखेका छन् ।

समूह ‘जे’ मा अर्जेन्टिनाले समूह जितिसकेको छ । अष्ट्रिया र अल्जेरियाबीच दोस्रो स्थानका लागि सीधा प्रतिस्पर्धा हुनेछ । अष्ट्रियालाई बराबरी पर्याप्त छ भने अल्जेरियालाई जित आवश्यक छ ।

समूह ‘के’ मा कोलम्बिया शीर्ष दुईमा पुगिसकेको छ । पोर्चुगललाई दोस्रो स्थान सुरक्षित गर्न बराबरी पर्याप्त हुनेछ । डिआर कंगोले भने जित निकाल्दै उत्कृष्ट तेस्रो टोलीको आशा कायम राख्न सक्छ ।

समूह ‘एल’ मा इंग्ल्यान्ड गोल अन्तरका आधारमा घानाभन्दा माथि छ । इंग्ल्यान्डले पानामासँग खेल्दैछ भने घानाले क्रोएसियासँग प्रतिस्पर्धा गर्नेछ । घानालाई शीर्ष दुईमा रहन कम्तीमा बराबरी आवश्यक छ । क्रोएसियालाई भने स्वतः छनोटका लागि जित अपरिहार्य छ ।

तेस्रो स्थानमा रहने टोलीहरूको छनोट पनि निकै रोचक बन्ने देखिएको छ । १२ समूहका तेस्रो स्थानमा रहेका टोलीमध्ये उत्कृष्ट आठ टोलीले अन्तिम ३२ मा स्थान बनाउनेछन् । त्यसका लागि पहिलो आधार अंक हुनेछ । अंक बराबर भए गोल अन्तर, त्यसपछि गोल संख्या, अनुशासन अंक र अन्तिममा फिफा वरीयता प्रयोग गरिनेछ ।

यसरी विश्वकप समूह चरणको अन्तिम खेलहरू सुरू भएसँगै धेरै टोलीहरूको भविष्य अन्तिम ९० मिनेटमा निर्भर रहेको छ ।केही टोलीले नकआउट यात्रा सुनिश्चित गरिसकेका छन् भने धेरै टोलीहरू अझै पनि अन्तिम खेलको नतिजाको प्रतीक्षामा छन् । अबको केही दिनभित्र विश्वकपको नकआउट चरणको पूरा तस्वीर स्पष्ट हुनेछ ।