एजेन्सी । भारतीय व्यापारिक घराना अडानी समूहसँगको सहुलियत सम्झौता रद्द भएको दुई वर्षपछि केन्याले आफ्नो सबैभन्दा ठूलो विमानस्थलको स्तरोन्नतिका लागि चिनियाँ कम्पनीलाई छनोट गरेको यस मामिलासँग परिचित व्यक्तिहरूले बताएका छन् ।
कुल २.९ अर्ब डलर लागतको जोमो केन्याटा अन्तर्राष्ट्रिय विमानस्थलको स्तरोन्नति र विस्तार गर्नका लागि चाइना कम्युनिकेसन कन्स्ट्रक्सन कम्पनी (सीसीसीसी) लाई इन्जिनियरिङ, खरिद र निर्माणको ठेक्का दिइएको छ । यस विषयमा कुरा गर्न आधिकारिक अनुमति नभएकाले आफ्नो पहिचान गोप्य राख्न आग्रह गर्दै ती व्यक्तिहरूले सो जानकारी दिएका हुन् ।
यस सम्झौताले केन्याका प्रमुख पूर्वाधार आयोजनाहरूमा चिनियाँ कम्पनीहरूको पकडलाई अझ बलियो बनाएको छ जहाँ सीसीसीसीको लगानीमा यसअघि नै नयाँ रेलवे, ६० हजार सिटको रंगशाला, टोल रोड र एउटा सम्मेलन केन्द्र समावेश छन् ।
विमानस्थल आयोजनाको केही हिस्सा नयाँ गठन गरिएको राष्ट्रिय पूर्वाधार कोषमा लगानी गरिएको निजीकरणबाट प्राप्त रकमबाट बेहोरिनेछ । यसै महिनादेखि निर्माण कार्य सुरु हुने अपेक्षा गरिएको ती व्यक्तिहरूले बताएका छन् । केन्याले हवाई यात्री सेवा शुल्कलाई धितो राखेर लिइने व्यावसायिक ऋणमार्फत पनि यस आयोजनाको वित्तपोषण गर्नेछ ।
केन्याका यातायात सचिव डेभिड चिर्चिरले यस विषयमा टिप्पणीका लागि गरिएको अनुरोधको कुनै जवाफ दिएनन् । सरकारी स्वामित्वको सीसीसीसीका प्रतिनिधिहरूले पनि यस्तै अनुरोधको तुरुन्तै कुनै प्रतिक्रिया दिएनन् ।
नैरोबी विमानस्थल तीन दशकसम्म सञ्चालन गर्नका लागि भारतीय अर्बपति गौतम अडानीले राखेको २.६ अर्ब डलरको प्रस्तावले सन् २०२४ मा विरोध प्रदर्शन र हवाई मजदुरहरूको हडताल निम्त्याएको थियो । त्यसकारण राष्ट्रपति विलियम रुटोको सरकार सो सम्झौता रद्द गर्न बाध्य भएको थियो ।
लामो समयदेखि पूर्वी अफ्रिकी उड्डयन केन्द्रका रूपमा रहेको केन्याले छिमेकी देशहरूले प्रतिस्पर्धा बढाएसँगै आफ्नो सबैभन्दा ठूलो विमानस्थलको स्तरोन्नति गर्न हतार गरिरहेको छ । इथियोपियाले यस महादेशको सबैभन्दा ठूलो एयरलाइन्स सञ्चालन गर्छ र आफ्नो राजधानी नजिकै १२.५ अर्ब डलरको नयाँ विमानस्थल बनाउने योजनामा छ जबकि रुवान्डाले पनि खाडीको एयरलाइन्स कतार एयरवेजसँगको साझेदारीमा नयाँ विमानस्थल निर्माण गरिरहेको छ ।
प्रतिक्रिया