टोयोटाको विश्वव्यापी बिक्रीमा लगातार गिरावट, चीन र पश्चिम एसियामा ठूलो धक्का

एजेन्सी । टोयोटा मोटरको व्यापारमा लगातार गिरावट आएको छ । यसअघिका दुई महिना निरन्तर घटेको यो कम्पनीको व्यापार तेस्रो महिनामा पनि गिरावट आएको हो । 

पछिल्लो तथ्यांक अनुसार अप्रिल महिनामा कम्पनीको विश्वव्यापी सवारी साधन बिक्रीमा लगातार तेस्रो महिना गिरावट आएको छ। विशेष गरी चीन र मध्य पूर्वको बजारमा आएको भारी गिरावटले टोयोटाको समग्र बिक्रीलाई प्रभावित गरेको हो।

गत वर्षको सोही अवधिको तुलनामा टोयोटाको विश्वव्यापी बिक्री ३.१ प्रतिशतले घटेर ८ लाख ४९ हजार ३ सय ६ (८४९,३०६) पुगेको छ। यस अवधिमा वैदेशिक बिक्री ७.५ प्रतिशतले खुम्चिएको छ ।

यद्यपि, जापानको आन्तरिक बजारमा भने बिक्री २४.२ प्रतिशतले बढेको छ। वातावरणीय कर परिवर्तन हुनुअघि रोकिएका खरिदहरू अहिले पुनः सुचारु भएकाले जापानमा यो वृद्धि देखिएको हो।

क्षेत्रीय स्तरमा हेर्दा, मध्य पूर्वमा टोयोटाको बिक्री ३३.७ प्रतिशतले घटेर ३१ हजारको हाराहारीमा झरेको छ। त्यस्तै, बजारमा देखिएको कठिन अवस्थाका कारण चीनमा बिक्री २५.४ प्रतिशतले घटेको छ। टोयोटाको सबैभन्दा ठूलो बजार मानिने अमेरिकामा पनि बिक्री ४.६ प्रतिशतले घटेको छ।

बिक्री घटे पनि उत्पादनमा भने केही सुधार देखिएको छ। अप्रिलमा टोयोटाको विश्वव्यापी उत्पादन गत वर्षको तुलनामा २.० प्रतिशतले बढेको छ ।

अमेरिका र जापानमा उत्पादन घटे तापनि एसियाली क्षेत्रमा भएको १२.९ प्रतिशतको उत्पादन वृद्धिका कारण समग्र उत्पादन सन्तुलित रहन सफल भएको हो । यी तथ्यांकहरूमा टोयोटाको लक्जरी ब्रान्ड ‘लेक्सस’को बिक्री र उत्पादन विवरण पनि समावेश गरिएको छ।