काठमाडौँ । पाल्पा सिमेन्ट इन्डस्ट्रिजले ६ महिनामा करिब २ अर्ब रुपैयाँको कारोबार गरेको छ । कम्पनीले चालू आर्थिक वर्षको ६ महिनामा १ अर्ब ८९ करोड रुपैयाँको कारोबार गरेको हो ।
कम्पनीले गत आवमा ४ अर्ब ११ करोड २० लाख रुपैयाँको कारोबार गरेको थियो । कम्पनीले सन् २०२४ मा ४ अर्ब २२ करोड ६० लाख रुपैयाँ, सन् २०२३ मा ४ अर्ब १२ करोड ९० लाख रुपैयाँ र सन् २०२२ मा ३ अर्ब ८१ करोड ८० लाख रुपैयाँको कारोबार गरेको थियो ।
कम्पनीको व्यापार गत आवको ६ महिनाको तुलनामा चालू आवको सोही अवधिमा ४६ प्रतिशतले वृद्धि भएको छ । गत आवमा सिमेन्टको मागमा कमी आउँदा व्यापार पनि घटेको कम्पनीले जनाएको छ ।
सन् २००९ मा स्थापना भएको कम्पनीले सिमेन्ट उत्पादन गरी बिक्री-वितरण गर्दै आएको छ । कम्पनीले सन् २०१९ देखि क्लिङ्कर र सन् २०२० देखि ग्राइन्डिङ सिमेन्टको व्यावसायिक कारोबार सुरु गरेको थियो । कम्पनीको आफ्नै खानी उद्योगबाट ३० किलोमिटरको दूरीमा छ । कम्पनीले वार्षिक ५ लाख मेट्रिक टन क्षमतामा क्लिङ्कर र ७ लाख मेट्रिक टन क्षमतामा सिमेन्ट उत्पादन गर्दै आएको छ । कम्पनीले भर्टिकल रोलिङ मिल प्रविधिको प्रयोग गरी सिमेन्ट उत्पादन गर्दै आएको छ ।
कम्पनीले आन्तरिक बजारसँगै भारतमा पनि सिमेन्ट निर्यात गर्दै आएको छ । कम्पनीले सन् २०२४ मा २५ प्रतिशत, सन् २०२५ मा १९ प्रतिशत र चालू आवको ६ महिनाको अवधिमा २४ प्रतिशत आम्दानी निर्यातबाट गरेको उल्लेख छ ।
कम्पनीले हालै मात्र ७५ करोड रुपैयाँको प्राथमिक सेयर निष्कासन (आईपीओ) सफलतापूर्वक सम्पन्न गरेको छ । उक्त आईपीओबाट प्राप्त रकम योजनाअनुसार स्थायी चालू पुँजी कर्जा घटाउन प्रयोग गरिएको छ ।
आरएमसी ग्रुपद्वारा सञ्चालित कम्पनीले दीर्घकालीन तथा अल्पकालीन कर्जाका लागि ७ अर्ब ५२ करोड ४३ लाख रुपैयाँको रेटिङ गराएको छ । कम्पनीले दीर्घकालीन कर्जाका लागि ५ अर्ब ८३ करोड ८३ लाख रुपैयाँ र अल्पकालीन कर्जाका लागि १ अर्ब ६८ करोड ६० लाख रुपैयाँको रेटिङ गराएको हो ।
इक्रा नेपालले कम्पनीको अल्पकालीन ऋणको रेटिङलाई ‘ए-फोर’ बाट बढाएर ‘ए-फोर प्लस’ दिएको छ । यो रेटिङले कम्पनीको साख र भुक्तानी क्षमतामा भएको सुधारको संकेत गर्दछ ।
पाल्पा सिमेन्टको प्रवर्द्धक आरएमसी ग्रुपसँग निर्माण सामग्री उत्पादन र बिक्रीमा दुई दशकभन्दा लामो अनुभव छ । ग्रुपको मुख्य कम्पनी ‘राजेश मेटल क्राफ्ट्स’ सन् १९९३ देखि सञ्चालनमा छ । प्रवर्द्धकहरूको यो अनुभवले कम्पनीलाई बजारमा स्थापित हुन ठूलो मद्दत पुगेको छ ।
कम्पनीको नेपालभर १५० भन्दा बढी डिलरहरूको सञ्जाल छ । आरएमसी ग्रुपको पहिलेदेखिकै बजार पहुँचका कारण पाल्पा सिमेन्टले छोटो समयमै आफ्नो बजार विस्तार गर्न सकेको हो ।
कम्पनीको सिमेन्ट उद्योग र चुनढुङ्गा खानीबीचको दूरी (करिब ३० किलोमिटर) तुलनात्मक रूपमा कम छ । यसले गर्दा अन्य प्रतिस्पर्धी कम्पनीहरूको तुलनामा पाल्पा सिमेन्टलाई ढुवानी खर्चमा बचत भई लागत कम गर्न सघाउ पुगेको छ ।
सिमेन्ट उद्योगमा मागको मन्दी भए तापनि विगत तीन वर्षदेखि कम्पनीको सञ्चालन मुनाफा २२% देखि २४% को बीचमा स्थिर रहेको छ, जुन उद्योगको औसत ट्रेन्डभन्दा राम्रो हो ।
हाल बजारमा पाल्पा सिमेन्टको ‘ब्रान्ड रिकल’ (उपभोक्ताले ब्रान्ड चिन्ने क्षमता) क्रमशः सुधार हुँदै गएको छ र यसको वितरण च्यानल पनि विविधीकृत छ । कम्पनीको ‘ऋण सेवा कभरेज अनुपात’ आर्थिक वर्ष २०२५ मा १.२ गुणा रहेकोमा चालू आर्थिक वर्षको ६ महिनामा सुधार भएर १.४ गुणा पुगेको छ । यसले कम्पनी आफ्नो ऋण र ब्याज तिर्न बढी सक्षम हुँदै गएको देखाउँछ ।
भर्खरै निष्कासन गरिएको आईपीओबाट प्राप्त ७५ करोड रुपैयाँले कम्पनीको चालू पुँजीको भार कम गरेको छ, जसले गर्दा कम्पनीको वित्तीय लचकता बढेको छ ।
प्रतिक्रिया