ग्राहकको १ करोड ६५ लाख आफ्नो खातामा पठाउने बैंकका एक कर्मचारी पक्राउ

तौलिहवा । बैंक खातामा रहेको ग्राहकको ठूलो रकम आफ्नै खातामा ट्रान्सफर गरी हिनामिना गरेको आरोपमा कपिलवस्तुको तौलिहवास्थित एक बैंकका कर्मचारी पक्राउ परेका छन् ।

जिल्ला प्रहरी कार्यालय कपिलवस्तुले बैंकिङ प्रणालीको दुरुपयोग गरी ग्राहकको करोडौँ रकम हिनामिना गरेको आरोपमा एक बैंकका कर्मचारी कपिलवस्तुको मायादेवी गाउँपालिका वडा नम्बर १, पकडी बस्ने २८ वर्षीय रिषभ कार्कीलाई पक्राउ गरेको हो।

कार्कीले बैंकको कर्मचारी हुनुको फाइदा उठाउँदै विभिन्न समयमा बैंकको आन्तरिक प्रणालीभित्र प्रवेश गरी अनधिकृत कार्य गरेको पाइएको जिल्ला प्रहरी कार्यालय कपिलवस्तुका सूचना अधिकारी एवं प्रहरी नायव उपरीक्षक रिपेन्द्र कुमार सिंहले जानकारी दिए ।

कार्कीले केही ग्राहकहरूको खातामा दर्ता भएको मोबाइल नम्बर परिवर्तन गरी आफ्नै मोबाइल नम्बर राखेको र मोबाइल बैंकिङको ‘ट्रान्जेक्सन अलर्ट’ (पैसे काटिएको सन्देश) समेत नआउने बनाएका थिए ।

त्यसपश्चात् उनले मोबाइल बैंकिङ र कनेक्ट आइपीएसको माध्यमबाट विभिन्न ग्राहकहरूको खाताबाट कुल १ करोड ६५ लाख रुपैयाँ अनधिकृत रूपमा ट्रान्सफर गरी रकम हिनामिना गरेको प्रहरीको दाबी छ ।

इलाका प्रहरी कार्यालय पकडीबाट खटिएको प्रहरी टोलीले कार्कीलाई २०८२ चैत ११ गते पकडी क्षेत्रबाटै नियन्त्रणमा लिएको हो । उनीमाथि बैंकिङ कसुर सम्बन्धी मुद्दामा थप अनुसन्धान गर्न उच्च अदालत तुलसीपुर, बुटवल इजलासबाट ७ दिनको म्याद थप गरी हिरासतमा राखिएको डीएसपी सिंहले जानकारी दिए ।

विज्ञप्ति जारी गर्दै यस्ता ठगीबाट जोगिन आफ्ना बैंक खाता र मोबाइल बैंकिङमा प्रयोग भएका मोबाइल नम्बरहरू समय-समयमा यकिन गर्न र सचेत रहन सम्पूर्ण सर्वसाधारणलाई अनुरोध समेत गरेका छन् ।