सोलिडकोर ब्याट्री र हाइब्रिड प्लस प्रविधिबाट एमजीका विद्युतीय कार अझ शान्त, सुरक्षित र शक्तिशाली हुने

काठमाडौं । एमजीले सवारी साधनको क्षेत्रमा क्रान्तिकारी परिवर्तन ल्याउने लक्ष्यका साथ नयाँ प्रविधियुक्त हाइब्रिड कार र ब्याट्री प्रणालीको विकास गरिरहेको छ । कम्पनीले हालै जर्मनीको फ्रान्कफर्टस्थित आफ्नो इन्जिनियरिङ केन्द्रमा नयाँ ‘हाइब्रिड प्लस’ प्रणाली विकास गरिरहेको जानकारी दिएको छ ।

एमजीका वरिष्ठ इन्जिनियर क्यू जिले फ्रान्कफर्टमा आयोजित एक कार्यक्रममा नयाँ इलेक्ट्रिक टर्बो प्रविधिको बारेमा जानकारी दिए । उनका अनुसार यो टर्बो प्रति मिनेट ७० हजार पटक (७०,००० आरपीएम) घुम्न सक्छ। यसले गाडीको क्षमता र दक्षता बढाउनुका साथै विद्युतीय र पेट्रोल इन्जिनबीचको शक्ति वितरणलाई सहज बनाउँछ । यो नयाँ प्रविधि आगामी एमजी एस ९ प्लग-इन हाइब्रिड कारमा पहिलोपटक प्रयोग हुने अनुमान गरिएको छ ।
यस प्रणालीमा विशेष मोटरको प्रयोग गरिनेछ, जसले गाडीको आवाज निकै कम गर्नेछ । साथै, गाडीभित्रका सेन्सरहरूले इन्जिनको कम्पन (भाइब्रेसन) पत्ता लगाएर त्यसलाई घटाउन मोटरमार्फत विपरीत बल प्रयोग गर्ने ‘डिजिटल ड्याम्पिङ’ प्रविधिको पनि प्रयोग गरिएको छ । यसले यात्रालाई अझ शान्त र आरामदायक बनाउने दाबी गरिएको छ ।

एमजीले आफ्ना विद्युतीय कारहरूमा पनि ठूलो सुधार गर्दै ‘सेमी-सोलिड-स्टेट’ ब्याट्री (जसलाई ‘सोलिडकोर’ नाम दिइएको छ) सार्वजनिक गर्ने तयारी गरेको छ । यो प्रविधि यसै वर्ष युरोपमा एमजी ४ इलेक्ट्रिक ह्याचब्याकको उच्च संस्करणमा प्रयोग गरिनेछ ।

यो ब्याट्रीमा ९५ प्रतिशत सोलिड र ५ प्रतिशत मात्र तरल पदार्थ हुनेछ, जसले गर्दा यो साधारण ब्याट्रीभन्दा बढी शक्तिशाली र टिकाउ हुनेछ । बढी ऊर्जा सञ्चय गर्न सक्ने भएकाले गाडीले लामो दूरी तय गर्न सक्छ । यसलाई निकै छोटो समयमा चार्ज गर्न सकिन्छ । सामान्य लिथियम आयन ब्याट्रीमा क्षति पुग्दा आगलागी हुने जोखिम हुन्छ, तर यो नयाँ ब्याट्रीलाई थिच्दा वा प्वाल पार्दा पनि आगो वा स्पार्क उत्पन्न हुँदैन । लिथियम र म्याङ्गनिसको मिश्रणले यसलाई थप स्थिर बनाएको छ ।

एमजीले नयाँ हाइब्रिड प्रणालीलाई सहयोग गर्न १.८३ किलोवाट घण्टाको ठूलो ब्याट्री पनि थप्दैछ । यी सबै नयाँ प्रविधिमार्फत एमजीले आफ्ना भविष्यका गाडीहरूलाई अझ शक्तिशाली, सहज, सुरक्षित र ऊर्जा-दक्ष बनाउने लक्ष्य राखेको छ ।