एजेन्सी । आइतबार पाकिस्तानको कराँचीको माई कोलाची रोडमा रहेको अमेरिकी वाणिज्य दूतावास नजिकै प्रदर्शनकारी र सुरक्षाकर्मीहरूबीच भएको झडपमा कम्तीमा ६ जनाको मृत्यु भएको डन पत्रिकाले समाचार प्रकाशन गरेको छ ।
शनिबार तेहरानमा अमेरिका र इजरायलले गरेको समन्वयात्मक हवाई आक्रमणमा इरानका सर्वोच्च नेता आयातोल्लाह अली खमेनीको हत्या भएपछि यो विरोध प्रदर्शन भएको हो ।
एधी फाउन्डेसनको एक विज्ञप्ति अनुसार, स्थितिलाई नियन्त्रणमा लिन सुरक्षाकर्मीहरूले अश्रूग्यास प्रहार र लाठीचार्जको सहारा लिएका थिए ।
डन पत्रिकासँग कुरा गर्दै प्रहरी सर्जन डा. सुम्मैया सैयदले कराँची सिभिल अस्पतालमा ६ वटा शव ल्याइएको बताइन् ।
यसअघिको एक विज्ञप्तिमा एधीले आफ्नो एम्बुलेन्सले शव र धेरै घाइतेहरूलाई सिभिल अस्पताल पुर्याएको जनाएको थियो ।
सिन्धका गृहमन्त्री जियाउल हसन लन्जारले कराँचीका अतिरिक्त प्रहरी महानिरीक्षक आजाद खानसँग स्थितिको बारेमा तुरुन्तै विवरण मागेको उनको कार्यालयबाट जारी विज्ञप्तिमा भनिएको छ ।
‘कसैलाई पनि कानुन आफ्नो हातमा लिन दिइने छैन,’ लन्जारले भने । उनले संवेदनशील प्रतिष्ठानहरूको सुरक्षालाई अझ प्रभावकारी बनाउन आदेश दिएका छन् ।
मन्त्रीले ट्राफिक प्रवाहलाई सुचारु राख्न वैकल्पिक मार्गहरू निर्धारण गर्न र कानुन कार्यान्वयन गर्ने निकायहरूलाई पूर्ण रूपमा सतर्क रहन र स्थितिको नजिकबाट अनुगमन गर्न निर्देशन दिएका छन् ।
‘शान्ति सुरक्षामा खलल पुर्याउने तत्त्वहरूका विरुद्ध कानुनबमोजिम कारबाही गरिनेछ,’ लन्जारले चेतावनी दिए ।
प्रतिक्रिया