काठमाडौं । नेपाल बिमा प्राधिकरणले आगामी माघ १ गतेदेखि सबै प्रकारका भुक्तानीहरू अनिवार्य रूपमा विद्युतीय प्रणाली मार्फत गर्ने व्यवस्था मिलाउन बिमा कम्पनीहरूलाई निर्देशन दिएको छ ।
प्राधिकरणले जीवन बिमा कम्पनी, निर्जीवन बिमा कम्पनी, लघुबिमा कम्पनी, पुनर्बीमा कम्पनी र बिमा दलालहरूलाई आगामी माघ १ गतेदेखि सबै प्रकारका भुक्तानीहरू सम्बन्धित व्यक्ति वा संस्थाका बैंक खातामा अनिवार्य रूपमा विद्युतीय प्रणाली मार्फत गर्ने व्यवस्था मिलाउन निर्देशन दिएको हो ।
सम्पत्ति शुद्धीकरण निवारण सम्बन्धी निर्देशन, २०८२ मा बिमकले बिमालेख अन्तर्गत दाबी भुक्तानी गर्दा अनिवार्य रूपमा बिमालेखका शर्त पालना गर्नुपर्छ । प्रचलित कानून बमोजिम भुक्तानी पाउने व्यक्तिको बैंक वा वित्तीय संस्थामा रहेको खातामा जम्मा हुने गरी भुक्तानी गर्नु पर्ने व्यवस्था रहेको छ ।
नेपाल सरकारले सार्वजनिक निकायबाट हुने सबै प्रकारका भुक्तानी बैंकिङ प्रणाली मार्फत डिजिटल माध्यमबाट गर्नुपर्ने व्यवस्था कार्यान्वयनमा ल्याइसकेकोले पनि प्राधिकरणले सबै बिमा कम्पनीहरुलाई एकीकृत निर्देशन दिएको हो ।
यसअघि प्राधिकरणले बिमा कमपनीका स्थायी, अस्थायी, करार वा ज्यालादारी वा अन्य कुनै पनि प्रकारका कर्मचारी तथा श्रमिकहरूलाई दिइने पारिश्रमिक वा ज्याला बापतको भुक्तानी अनिवार्य रूपमा बैंक वा वित्तीय संस्था मार्फत गर्न निर्देशन दिएको थियो ।
सम्बन्धित कर्मचारी तथा श्रमिकको बैंक खातामा भुक्तानी गर्ने व्यवस्था गर्न बिमा कम्पनीहरूलाई दिएको यसअघिको निर्देशन पालना भइसकेको नेपाल बिमा प्राधिकरणका कार्यकारी निर्देशक तथा प्रवक्ता शुशीलदेव सुवेदीले जारी गरेको एक प्रेस विज्ञप्तिमा उल्लेख छ ।
प्रतिक्रिया