बर्लिनमा डढेलोका कारण विद्युत् आपूर्ति ठप्प, उग्रवामपन्थीले आक्रमण गरेको अधिकारीहरूको आरोप

एजेन्सी । जर्मनीको दक्षिण–पश्चिम बर्लिनमा लागेको डढेलोका कारण दशौं हजार मानिसको घरमा विद्युत् आपूर्ति ठप्प भएको छ ।

यो उग्रवामपन्थी समूहले गरेको आक्रमणको परिणाम भएको अधिकारीहरूले आइतबार बताएका छन् ।

ग्रिड कम्पनी स्ट्रोमनेट्ज बर्लिनले शनिबार उक्त शंकास्पद आगजनीको आक्रमणका कारण आगामी जनवरी ८ सम्म करिब ४५ हजार घरधुरी विद्युतविहीन हुन सक्ने जनाएको छ ।

आइतबार कम्पनीले बिजुली पुनर्बहाली गर्ने प्रयास भइरहेको र अझै पनि करिब ३५ हजार घरधुरी र १९ सय व्यापारिक प्रतिष्ठानहरू प्रभावित रहेको जानकारी दिएको छ ।

आक्रमणपछि स्थानीय सञ्चारमाध्यमहरूले भोल्कानो ग्रुप नामक उग्रवामपन्थी कार्यकर्ता संगठनको भनिएको एउटा पत्र प्रकाशित गरेका छन् । उक्त पत्रमा घटनाको जिम्मेवारी लिँदै आफ्नो कार्य जीवाश्म इन्धनमा आधारित ऊर्जा उद्योगप्रति लक्षित रहेको बताइएको छ ।

आन्तरिक मामिलामन्त्री आइरिस स्प्रान्जरले सामाजिक सञ्जाल एक्समा एक पोस्ट गर्दै भनिन्, ‘जिम्मेवारी लिइएको उक्त पत्रलाई सुरक्षा अधिकारीहरूले आधिकारिक मानेका छन् ।’

उनले थप भनिन्, ‘म बर्लिनका बासिन्दा र शहरमा आएका पाहुनाहरूमाथि गरिएको यो अमानवीय आक्रमणको कडा शब्दमा भर्त्सना गर्दछु । अनुसन्धान जारी छ ।’

यसअघि सेप्टेम्बरमा पनि दुईवटा बिजुलीका ठूला खम्बाहरूमा भएको शंकास्पद आगजनीले बर्लिनका करिब ५० हजार घरधुरीको बिजुली अवरुद्ध पारेको थियो । स्थानीय सञ्चारमाध्यमका अनुसार, यो घटना सन् २०२४ मा ग्रुएनहाइडस्थित टेस्लाको गिगाफ्याक्ट्रीको विद्युत् आपूर्तिमा भोल्कानो ग्रुपले गरेको चर्चित आक्रमणसँग मिल्दोजुल्दो थियो ।