माइक्रोसफ्टले भारतमा १७.५ अर्ब डलर लगानी गर्ने

एजेन्सी । माइक्रोसफ्टले भारतमा १७.५ अर्ब डलर लगानी गर्ने भएको छ ।

कम्पनीका प्रमुख कार्यकारी अधिकृत सत्य नाडेलाले सामाजिक सञ्जाल एक्समार्फत यो जानकारी दिएका हुन् ।

विश्वमा तीव्र गतिमा बढिरहेको डिजिटल बजारमध्ये एक भारतमा पूर्वाधार निर्माण गर्न सफ्टवेयर कम्पनीहरूबीच प्रतिस्पर्धा चलिरहँदा यो लगानीको घोषणा भएको हो ।

माइक्रोसफ्टका सीईओले यसलाई एसियामा कम्पनीको अहिलेसम्मकै ठूलो लगानी बताएका छन् ।

माइक्रोसफ्टले एक विज्ञप्तिमा भनेको छ, ‘आज हामी एसियामा हाम्रो सबैभन्दा ठूलो लगानीको घोषणा गर्दैछौं । भारतमा चार वर्ष (सन् २०२६ देखि २०२९ सम्म) को अवधिमा १७.५ अर्ब डलर लगानी गर्दैछौं । यसले देशको क्लाउड र कृत्रिम बुद्धिमत्ता (एआई) पूर्वाधार, सीप विकास र जारी सञ्चालनहरूलाई अगाडि बढाउनेछ । यो लगानी यस वर्षको सुरुमा घोषणा गरिएको ३ अर्ब अमेरिकी डलरको लगानीमा थपिएको हो जुन हामी सन् २०२६ को अन्त्यसम्ममा खर्च गर्ने योजनामा छौं ।’

नाडेलाले भारतका प्रधानमन्त्री नरेन्द्र मोदीसँग भेट गरेपछि र कम्पनीको इन्डिया एआई टुर अघि माइक्रोसफ्टको यो घोषणा आएको हो । भेटमा दुवै नेताले देशको एआई रोडम्याप र विकासका प्राथमिकताहरूबारे छलफल गरेको बताइएको छ ।

भारतमा कम्पनीको लगानी तीन स्तम्भहरू स्केल (विस्तार), स्किल (सीप) र सोभरेन्टी (सार्वभौमिकता) मा केन्द्रित रहेको माइक्रोसफ्टले जनाएको छ । यो राष्ट्रिय स्तरमा एआई नवप्रवर्तन र पहुँच बढाउने प्रधानमन्त्री मोदीको दृष्टिकोणसँग मेल खान्छ ।

नाडेलाले लेखेका छन्, ‘भारतको एआई अवसरबारे प्रेरणादायी कुराकानीका लागि धन्यवाद, प्रधानमन्त्रीजी । देशको महत्त्वाकांक्षालाई समर्थन गर्न, माइक्रोसफ्टले १७.५ अर्ब अमेरिकी डलर जुन एसियामा हाम्रो अहिलेसम्मकै ठूलो लगानी हो त्यसको प्रतिबद्धता जनाउँदैछ । यसले भारतको एआई फर्स्ट भविष्यका लागि आवश्यक पूर्वाधार, सीप र सार्वभौम क्षमताहरू निर्माण गर्न मद्दत गर्नेछ ।’

नाडेलालाई जवाफ दिँदै प्रधानमन्त्री मोदीले लेखे, ‘एआईको कुरा आउँदा विश्व भारतप्रति आशावादी छ ! सत्य नाडेलाज्यूसँग धेरै फलदायी छलफल भयो । भारत त्यो ठाउँ बन्दै गरेको देख्दा खुसी लागेको छ जहाँ माइक्रोसफ्टले एसियामा आफ्नो अहिलेसम्मकै ठूलो लगानी गर्नेछ । भारतका युवाहरूले यो अवसरलाई नवप्रवर्तन गर्न र पृथ्वीको भलाइको लागि एआईको शक्ति सदुपयोग गर्न प्रयोग गर्नेछन् ।’

माइक्रोसफ्टका सीईओले यो वर्ष दोस्रोपटक भारत भ्रमण गरेका हुन् ।

माइक्रोसफ्टको लगानीबारे बोल्दै केन्द्रीय इलेक्ट्रोनिक्स र सूचना प्रविधि मन्त्री अश्विनी वैष्णवले भने, ‘एआईले डिजिटल अर्थतन्त्रलाई पुनः आकार दिँदै गर्दा भारत विश्वास र सार्वभौमिकतामा आधारित नवप्रवर्तनप्रति प्रतिबद्ध छ । माइक्रोसफ्टको यो ऐतिहासिक लगानीले विश्वका लागि भारत एक भरपर्दो प्रविधि साझेदारको रूपमा उदाउँदै गरेको संकेत गर्छ । यस साझेदारीले नयाँ मापदण्डहरू तय गर्नेछ र देशलाई डिजिटल सार्वजनिक पूर्वाधारबाट एआई सार्वजनिक पूर्वाधारमा फड्को मार्न मद्दत गर्नेछ ।’

माइक्रोसफ्ट इन्डिया र दक्षिण एसियाका अध्यक्ष पुनीत चण्डोकले भने, ‘माइक्रोसफ्ट तीन दशकभन्दा बढी समयदेखि भारतको अभिन्न अंग रहँदै आएको छ । राष्ट्र आत्मविश्वासका साथ आफ्नो एआई–फर्स्ट भविष्यतिर अघि बढिरहेको अवस्थामा हामी पूर्वाधार, नवप्रवर्तन र अवसरलाई अगाडि बढाउन विश्वसनीय साझेदारको रूपमा उभिन पाउँदा गर्व महसुस गर्छौं जसले एक अर्ब सपनाहरूलाई शक्ति प्रदान गर्न सक्छ । सन् २०२५ को जनवरीमा घोषणा गरिएको ३ अर्ब डलरको लगानीमा थप गर्दै, हाम्रो नयाँ १७.५ अर्ब डलरको प्रतिबद्धता र भारतको प्रविधि इकोसिस्टममा गहिरो साझेदारी भारतको एआई महत्त्वाकांक्षालाई प्रत्येक नागरिकका लागि प्रभावकारी बनाउनमा केन्द्रित छ ।’

कम्पनीको नयाँ लगानी भारतभरि यसको क्लाउड र एआई पूर्वाधार, सीप विकास पहलहरू र जारी सञ्चालनहरू विस्तार गर्न प्रयोग गरिने माइक्रोसफ्टले घोषणा गरेको छ । यसमा बेंगलुरु, हैदराबाद, पुणे, गुरुग्राम, नोयडा र अन्य शहरहरूमा रहेका कम्पनीका २२ हजारभन्दा बढी कर्मचारीहरू समावेश छन् ।

सफ्टवेयर कम्पनीले सन् २०२६ को मध्यमा नयाँ डेटा सेन्टर सञ्चालनमा आएसँगै भारतमा सबैभन्दा ठूलो हाइपरस्केल (अत्यधिक ठूलो स्तरको कम्प्युटिङ) उपस्थिति बनाउने योजना साझा गरेको छ । ‘यो भारतमा हाम्रो सबैभन्दा ठूलो हाइपरस्केल क्षेत्र हुनेछ जसमा तीनवटा एभिलेबिलिटी जोन (उपलब्धता क्षेत्र) हुनेछन् जुन आकारमा लगभग दुईवटा इडेन गार्डेन स्टेडियम बराबर हुनेछन्,’ विज्ञप्तिमा भनिएको छ ।

यस वर्षको आरम्भमा आफ्नो भारत भ्रमणको क्रममा नाडेलाले आगामी दुई वर्षमा एआई र क्लाउड पूर्वाधारमा ३ अर्ब डलर लगानी गर्ने योजना घोषणा गरेका थिए ।