एजेन्सी । अमेरिकाले प्योर्तो रिकोमा रहेको रुजभेल्ट रोड्स जलसैनिक केन्द्रलाई पुनः सक्रिय गरेको छ ।
क्यारिबियाली क्षेत्रमा एफ–३५ लडाकु विमान, एउटा क्यारियर स्ट्राइक ग्रुप, बमवर्षक विमानहरू र एम्फिबियस फोर्सहरूलाई केन्द्रित गरिरहेको अमेरिकाले प्योर्तो रिकोको सैन्य केन्द्रलाई सक्रिय बनाएको हो ।
यो सैन्य तैनाथीलाई सार्वजनिक रूपमा लागूऔषधविरुद्धको अभियानका रूपमा प्रस्तुत गरिएको भए पनि व्यवहारमा यसले अमेरिकालाई भेनेजुएलाविरुद्ध दबाब सिर्जना गर्ने वा सैन्य विकल्प प्रयोग गर्ने सुरक्षित आधार तयार गरेको छ ।
रुजभेल्ट रोड्स शीतयुद्धकालमा उक्त क्षेत्रमा रहेको प्रमुख अमेरिकी जलसैनिक आधार थियो । त्यो सन् २००४ मा बन्द गरिएको थियो तर फेरि सञ्चालनमा आएको छ । सीबीएस न्युजको हालैको रिपोर्ट र उपग्रह तस्बिरहरूले पुष्टि गरेअनुसार अमेरिकाले उक्त सैन्य अड्डामा महत्त्वपूर्ण हवाई पूर्वाधार पुनर्निर्माण गरेको छ र नियमित सैन्य उडान तथा सञ्चालन सुरु गरिसकेको छ ।
अमेरिकाले दक्षिणी आन्ध्र महासागर क्षेत्रमा ‘स्ट्राइक’ होल्डिङ पुनःस्थापना गर्ने उद्देश्य राखेको देखिन्छ ।
यस सैन्य अड्डामा अहिले १० वटा एफ–३५ लाइटनिङ २ विमान तैनाथ छन् । त्यसलाई सेप्टेम्बरदेखि ‘ड्रग कार्टेलविरुद्ध’ को कारवाही नाम दिएर सञ्चालन गरिएको छ । तर, यी विमानका एईएसए रडार, सेन्सर–फ्युजन र इलेक्ट्रो–अप्टिकल प्रणालीहरूले समुद्री सतहका लक्ष्य वा कम उड्ने विमानलाई टाढैबाट पत्ता लगाउन सक्ने क्षमता दिन्छ । एफ–३५ ले करिब सबै दक्षिण क्यारिबियाली क्षेत्र कभर गरी फर्किन सक्छ । त्यसले सन् २००४ मा सैन्य अड्डा बन्द हुँदा उपलब्ध नभएको ‘अबाधित प्रक्षेपण क्षमता’ दिन्छ ।
रुजभेल्ट रोड्सको पुनः सक्रियता र क्यारिबियाली क्षेत्रमा अत्याधुनिक अमेरिकी क्षमताको केन्द्रीकरणले वैश्विक सुरक्षामा असर पार्नेछ । यसले जलसेना र वायुसेनलाई ‘कठोर पूर्वाधार’, ‘इन्टर–अपरेबल डेटा–लिंक’ र ‘दिगो लजिस्टिक्स’ को महत्त्व पुनः सम्झाएको छ ।
रुस र चीनका लागि भेनेजुएला सम्भावित अवलोकन र सैन्य सहकार्य क्षेत्र बन्न सक्छ भने छिमेकी राष्ट्रहरूले अमेरिकी समर्थन र सम्भावित क्षेत्रीय तनावबीच सन्तुलन मिलाउनुपर्ने स्थिति आएको छ ।
प्रतिक्रिया