३० अंकले घट्यो नेप्से, ४ अर्ब ९० करोडको कारोबार

काठमाडौं । सेयर बजारमा उच्च अंकको गिरावट आएको छ ।

साताको कारोबारको पहिलो दिन आइतबार सेयर बजार सूचक नेपाल स्टक एक्सचेञ्ज (नेप्से) ३०.०२ अंक अर्थात् १.१५ प्रतिशतले घटेर २५६६.०९ बिन्दुमा सीमित भएको छ ।

अघिल्लो कारोबार दिन अर्थात् गत साताको बिहीबार पनि नेप्से ११.२९ अंकले घटेर २५९६.१२ बिन्दुमा सीमित भएको थियो ।

आइतबार नेप्सेमा कुल ४ अर्ब ९० करोड रुपैयाँ बढीको कारोबार भएको छ । गत साताको बिहीबार भने नेप्सेमा कुल ५ अर्ब ३२ करोड रुपैयाँ बराबरको कारोबार भएको थियो ।

आइतबार कारोबारमा आएकामध्ये २८ कम्पनीको सेयर मूल्य बढ्दा २२२ कम्पनीको घटेको छ । यस्तै, एक कम्पनीको सेयर मूल्य भने स्थिर छ ।

आज पाँच कम्पनीको सेयर मूल्य नौ प्रतिशत बढीले वृद्धि हुँदा उन्नत सहकार्य लघुवित्त वित्तीय संस्थाको सेयर मूल्यमा नकारात्मक सर्किट लागेको छ ।