ट्रम्पले क्यानडासँगको सबै व्यापार वार्ता रद्द गरे

एजेन्सी । अमेरिकी राष्ट्रपति डोनाल्ड ट्रम्पले क्यानडासँगका सबै व्यापार वार्ताहरू तत्काल समाप्त गरेको जनाएका छन् ।

ट्रम्पले आफ्नो सामाजिक सञ्जाल प्लेटफर्म ‘ट्रुथ सोशल’ मा क्यानडाले एक विज्ञापन प्रसारण गरेको छ, जसमा पूर्व अमेरिकी राष्ट्रपति रोनाल्ड रिगनलाई ट्यारिफविरुद्ध बोल्दै देखाइएको छ ।

उनले आफ्नो पोस्टमा लेखेका छन्, ‘उनीहरूको अत्यन्तै अनुचित व्यवहारको आधारमा, क्यानडासँगका सबै व्यापार वार्ताहरू तत्काल समाप्त गरिन्छ।’

गत साता क्यानडाद्वारा जारी गरिएको एक मिनेट लामो विज्ञापनमा पूर्व अमेरिकी राष्ट्रपति रोनाल्ड रिगनको आवाज सुन्न सकिन्छ, जसमा उनी अमेरिकी र क्यानडाली झन्डाले सजिएका क्रेनहरू र न्युयोर्क स्टक एक्सचेन्जका दृश्यहरूबीच बोल्दै देखिन्छन्।

भिडियोमा सन् १९८७ मा रिगनले दिएका एक राष्ट्रिय रेडियो सम्बोधनको अंश समावेश गरिएको छ, जो वैदेशिक व्यापार र आर्थिक साझेदारीमा केन्द्रित थियो ।

ट्रम्प प्रशासनले हालै क्यानडाबाट आयात गरिने वस्तुहरूमा ३५ प्रतिशत ट्यारिफ लगाएको छ ।