मनसुनजन्य जोखिमकाबीच आजदेखि २४ सै घण्टा बिपी राजमार्ग सुचारु

काठमाडौं । सरकारले मनसुनजन्य जोखिमकाबीच असोज १ गतेदेखि विपी राजमार्ग २४ सै घण्टा सञ्चालन गर्न खुलाएको छ । पछिल्लो समयमा देशभर अविरल वर्षा भइरहेका कारण पहिरो जाने र सडक भाँसिने जोखिमकाबीच सरकारले उक्त राजमार्गलाई २४ सैं घण्टा सञ्चालनका लागि खुला गरेको हो ।

गत असोजमा परेको अविरल वर्षासँगै आएको उक्त सडक खण्ड क्षत विक्षत भएको छ । अहिले पनि धेरै स्थानमा पहिरो जाने जोखिम यथावतै छ । बाढीको भेलले जगदेखि नै सडक बगाएर लगेको छ । अहिले खोला किनारमा तयार पारिएको वैकल्पिक सडकबाट सवारी साधन ओहोर दोहोर गर्दैआएका छन् ।

दर्जनौं स्थानमा पहिरो जाने अति उच्च जोखिमयुक्त स्थानबाट सडक लगिएका छन् । पहिरोलाई रोक्न बाँस गाडिए पनि पहिरोको लेदोले उक्त बाँसको बारलाई भत्काउँदै सडकसम्मै पहिरो पुगिरहेको अवस्थामा सरकारले उक्त राजमार्ग २४ सैं घण्टा सञ्चालनको लागि खुला गरेको हो ।

यातायात व्यवसायीहरु पनि मनसुनजन्य प्रकोपमा उक्त सडक खण्ड उच्च जोखिममा रहेको बताउँदै आएका छन् । यस्तो अवस्थामा २४ सैं घण्टा सञ्चालनका लागि खोलिएका उक्त राजमार्गमा पहिरोजन्य जोखिमका कारण यात्रुहरुको यात्रा असुरक्षित हुन सक्ने व्यवसायीहरुको भनाई छ ।

यो वर्षको मनसुन सुरु भएसँगै जोखिमका कारण रातिको समयमा सवारीसाधन सञ्चालनमा रोक लगाइएको थियो ।

जिल्ला प्रशासन कार्यालय काभ्रेपलाञ्चोकमा सोमबार बसेको सुरक्षा समितिको बैठकले मनसुन बाहिरिने क्रममा रहनुका साथै दसैं, तिहारलगायत चाडपर्वलाई लक्षित गरी सडक २४ सै घण्टा सञ्चालन गर्ने निर्णय गरेको थियो ।

यात्रुको सहजताका लागि सडक सुरक्षामा सजगता अपनाइ स्वीकृत सडक सुरक्षा कार्ययोजनाबमोजिम निर्णय गरिएको समितिले जनाएको छ ।

कार्यालयद्वारा सोमबार जारी सार्वजनिक सूचनाअनुसार गत असार पहिलो सातादेखि रातिको समयमा सवारीसाधन आवतजावतमा पूर्ण रूपमा रोक लगाइएको थियो ।

मनसनमा बाढीपहिरोको जोखिमका कारण बिपी राजमार्गअन्तर्गत प्रथान बिन्दु काभ्रेपलाञ्चोकको धुलिखेलबाट सिन्धुलीको सिमाना नेपालथोकसम्म रातिको समयमा १२ घण्टासम्म यातायात सञ्चालनमा रोक लगाइएको थियो ।

यसअघि पछिल्लो पटक यही भदौ १६ गतेदेखि थप १५ दिन सवारी सञ्चालनमा रोक लगाइएको थियो । जोखिमका कारण गत असार ७ गतेदेखि राति सवारी सञ्चालनमा रोक लगाउँदै आइएकामा भदौ मसान्तसम्म रातको समयमा १२ घण्टा रोक लगाइएको थियो ।

मनसुनको समयमा बिपी राजमार्गमा यात्रा गर्नु उच्च जोखिम देखिएकाले राति निजी तथा सार्वजनिक सवारीसाधन सञ्चालनमा रोक लगाइएको थियो ।

गत वर्ष असोजको बाढीपहिरोले बिपी राजमार्गअन्तर्गत काभ्रेपलाञ्चोकको चौकीडाँडाबाट सिन्धुलीको वर्षेखोलासम्मको आठ किलोमिटर सडक बगाएपछि अस्थायी रूपमा सवारी सञ्चालनको व्यवस्था गरिएको थियो ।

बाढीपहिरोले राजमार्गको कुल १६० किमीमध्ये तेस्रो खण्डअन्तर्गत सिन्धुलीको खुर्कोटबाट नेपालथोकसम्म ३४ किमी र चौथोखण्ड नेपालथोकबाट काभ्रेपलाञ्चोकको धुलिखेलसम्म ५० किमीका विभिन्न स्थानमा क्षति पुर्‍याएको थियो ।

कार्यालयले क्षतिग्रस्त राजमार्ग स्थायी निर्माणका लागि चार खण्डमा ठेक्काको प्रक्रियामा घि बढाइरहेको छ । पूर्वी नेपाल जोड्ने छोटो दूरीका रूपमा रहेको उक्त राजमार्गबाट दैनिक हजारौं सवारीसाधन आवतजावत गर्छन् ।