काठमाडौं । पत्रकार दिलभूषण पाठकले आफ्नो नाममा जारी भएको पक्राउ पुर्जी कार्यान्वयनमा रोक लगाउन माग गर्दै उच्च अदालत पाटनमा निषेधाज्ञाको निवेदन दिएका छन् ।
जिल्ला अदालत काठमाडौंबाट पक्राउका लागि जारी पुर्जीविरुद्ध उनले सोमबार निवेदन दिएका हुन्। उच्च अदालत प्रशासनका अनुसार पाठकको निवेदन न्यायाधीश ऋषिराज भण्डारीको एकल इजलासमा सुनुवाइका लागि तोकिएको छ । उनको निवेदन इजलासको १२औं नम्बरमा रहेको छ ।
पाठकले आफ्नो युट्युब च्यानलमार्फत नेपाली कांग्रेसका सभापति शेरबहादुर देउवाका छोरा जयवीर देउवाले हिल्टन होटल खरिद गरेको भन्ने सामग्री प्रसारण गरेपछि परेको जाहेरीका आधारमा पक्राउ पुर्जी जारी भएको थियो ।
जयवीरले आफूविरुद्ध निराधार र कपोकल्पित सामग्री निर्माण गरेर सार्वजनिक गरिएको आरोप लगाउँदै साइबर अपराध अन्तर्गत उजुरी दिएका थिए । सोही उजुरीका आधारमा प्रहरी अनुसन्धान अगाडि बढाइएको हो ।
यस प्रकरणमा सञ्चार क्षेत्रका विभिन्न संघ–संस्थाहरूले पाठकविरुद्ध जारी गरिएको पक्राउ पुर्जी तत्काल स्थगन गर्न माग गर्दै पत्रकारिता स्वतन्त्रताको संरक्षणको माग गरेका छन् ।
प्रतिक्रिया