काठमाडौं । सरकारी अस्पतालमा करोडौंका उपकरण प्रयोगविहिनले राज्यको लगानी खेर गइरहेको छ भने विरामी उपचारबाट बञ्चित भएका छन् । महालेखा परीक्षकको ६२ औं प्रतिवेदनले सरकारी बेवास्था र गैरजिम्मेवारपूर्ण नेतृत्वका कारण विभिन्न अस्पातालमा रहेका यस्ता उपकरण अलपत्र परेको उल्लेख छ ।
प्रतिवेदन अनुसार कोशी अस्पतालले खरिद गरेको भेन्टिलेटर लगायतका रु. २ करोड ८ लाख ६५ हजार मूल्यका ५ प्रकारका उपकरण, चिकित्सा विज्ञान राष्ट्रिय प्रतिष्ठानमा विगतमा आफैँले खरिद गरेको उपकरण प्रयोगबिहिन छ ।
स्वास्थ्य सेवा विभागले हस्तान्तरण गरेको भेन्टिलेटर, पेसेन्ट मनिटर लगायत रु. ४ करोड २९ लाख ६५ हजार मूल्यका ७ प्रकारका उपकरण र बी. पी. कोइराला स्वास्थ्य विज्ञान प्रतिष्ठान, धरानलाई विगतमा स्वास्थ्य सेवा विभागले हस्तान्तरण गरेको रु.५ करोड ५९ लाख ४९ हजार मूल्यको पोर्टेबल यू.एस.जी.मेसिन र ११ थान भेन्टिलेटर प्रयोगबिहिन छ
सहिद गङ्गालाल राष्ट्रिय हृदय केन्द्रमा रु.२ करोड २५ लाख मूल्यको प्लाज्मा स्ट्रेलाइजर मेसिन १ थान लगायतका उपकरणहरू प्रयोगविहीन अवस्थामा रहेका छन्।
वि.पी. कोइराला स्वाथ्य विज्ञान प्रतिष्ठानबाट उपलब्ध कोभिड – १९ प्रयोजनको लागि स्थापना भएको १०० बेडको अस्पताल तत् पश्चात डेङ्गु उपचारको लागि प्रयोगमा ल्याएकोमा हाल भेण्टिलेटरसहितको २० बेड आई.सी.यू. र सो अस्पतालमा प्रयोग भएका रु. २४ करोड ५१ लाख ५२ हजारको उपकरण पनि प्रयोग बिहिन छ ।
ट्रमा सेन्टर अस्पतालमा मुटु रोगको उपचारमा उपयोग हुने अमेरिकी डलर ५० हजार ५०० को क्याथल्याब मेसिन तथा रु. २ करोड ५१ लाख ३२ हजार मूल्यको १४ थान भेन्टिलेटर, रु.८६ लाख ११ हजारका ५ थान सी. आर्म मेसिन र रु. ९९ लाख ६६ हजार मूल्यका ब्याकमान काउल्टर बिग्रिएको कारण सञ्चालनमा रहेको छैन ।
स्वास्थ्य तथा जनसंख्या मन्त्रालयले विभिन्न स्वास्थ्य संस्थामा रहेका उपकरणको सञ्चालन सम्बन्धमा अनुगमन गरी लगत तयार गर्नुका साथै प्रभावकारी उपयोगको व्यवस्था मिलाउनुपर्ने महालेखाले औल्याएको छ ।
प्रतिक्रिया