कुलमान र हितेन्द्रको मुद्दाको सुनुवाइ सकियो, आजै आदेश आउने

काठमाडौं । नेपाल विद्युत् प्राधिकरणका कार्यकारी निर्देशक हितेन्द्रदेव शाक्य र सरकारको बर्खास्तीमा परेका कुलमान घिसिङको रिटमाथिको सुनुवाइ सकिएको छ ।

न्यायाधीशद्वय डा. कुमार चुडाल र नित्यानन्द पाण्डेयको संयुक्त इजलासमा सोमबार पेसी चढेको मुद्दाको तीन दिनसम्म चलेको सनुवाइ आजबाट सकिएको हो ।

सर्वोच्च प्रशासनले मुद्दाको सुनुवाइ भइसकेको जनाएको छ । यी दुवै रिटमा आजै आदेश आउने बताइएको छ ।

अन्य कुनै मुद्दाको पेसी नतोकी उक्त इजलासमा कुलमान र हितेन्द्रको मात्र मुद्दा सुनुवाइ भएको हो ।

सरकारले नेपाल विद्युत प्राधिकरणको प्रबन्ध निर्देशकबाट हटाएपछि घिसिङले नेपाल सरकार, उर्जामन्त्रालय र उर्जामन्त्री तथा नेपाल विद्युत प्राधिकरण सञ्चालक समिति र नवनियुक्त कार्यकारी निर्देशक हितेन्द्रदेव शाक्यलाई विपक्षी बनाउँदै रिट दायर गरेका थिए ।

यस्तै सरकारले ४ वर्ष अगाडि कुलमानलाई नियुक्त गरेर आफूलाई हटाएको मुद्दा टुंगो नलाग्दै सरकारले आफूलाई पुनः विद्युत प्राधिकरणको प्रबन्ध निर्देशकको जिम्मेवारी दिएकोले शाक्यले पुरानो मुद्दा टुंगाइदिन भन्दै बिहीबार सर्वोच्च अदालतमा निवेदन दिएका थिए।

शुक्रबार सर्वोच्चका न्यायाधीश अब्दुल अजीज मुसलमानको इजलासमा पेसी चढेको मुद्दामा सुनुवाइ गर्दै न्यायाधीश मुसलमानले अन्तरिम आदेश जारी गरेनन् भने आइतबार दुवै पक्षलाई बोलाउने आदेश गरेका थिए ।

साथै हितेन्द्रको मुद्दामा समेत सँगै सुनुवाइ हुने भएको थियो । आइतबार सर्वोच्चका प्रधानन्यायाधीश प्रकाशमान सिंह राउत र न्यायाधीश शारङ्गा सुवेदीको संयुक्त इजलासले दुवैको मुद्दा हेर्न नभ्याइनेमा राखेको थियो । मंगलबार दुबै मुद्दामा एकसाथ सुनुवाइ भए पनि हेर्दा हेर्दैमा परेको हो ।

अघिल्लो सोमबार बसेको मन्त्रिपरिषद्को बैठकले कुलमान घिसिङलाई बर्खास्त गरेर हितेन्द्र देव शाक्यलाई प्राधिकरणमा प्रबन्ध निर्देशकको जिम्मेवारी दिएको हो ।