इजलासका सबै मुद्दा ‘हेर्न नभ्याइने’मा राखेर कुलमानको मुद्दामा सुनुवाई गर्दै सर्वाेच्च

काठमाडौं । नेपाल विद्युत प्राधिकरणको कार्यकारी निर्देशकबाट सरकारले बर्खास्त गरेपछि सर्वोच्च अदालत पुगेका कुलमान घिसिङको मुद्दामा मंगलबार सुनुवाई भइरहेको छ । सर्वोच्च अदालतका न्यायाधीशद्वय डा. कुमार चुडाल र नित्यानन्द पाण्डेयको संयुक्त इजलासमा पेशी चढेको उक्त मुद्दामा मंगलबार सुनुवाई भइरहेको छ ।

सोही इजलासमा मंगलबार कुलमान घिसिङ र हालका कार्यकारी निर्देशक हितेन्द्र देव शाक्यको मुद्दामा सुनुवाई भइरहेको छ । मंगलबार उक्त इजलासमा ३० वटा मुद्दाको पेश चढे पनि अरु सबै मुद्दा हेर्न नभ्याइनमा राख्दै कुलमान घिसिङ र हितेन्द्रदेव शाक्यको मुद्दामा मात्रै सुनुवाई भइरहेको छ ।

सरकारले गैरकानुनी रुपमा प्राधिकरण कार्यकारी निर्देशकबाट हटाएको भन्दै घिसिङले नेपाल सरकार, उर्जामन्त्रालय र उर्जामन्त्री, विद्युत प्राधिकरणको सञ्चालक समिति र हितेन्द्रदेव शाक्य समेतलाई विपक्षी बनाउँदै रिट दायर गरेका थियो ।

यस्तै सरकारले ४ वर्ष अगाडिको कुलमानलाई नियुक्त गरेर आफूलाई हटाएको मुद्दा टुंगो नलाग्दै सरकारले आफूलाई पुनः विद्युत प्राधिकरणको प्रबन्ध निर्देशकको जिम्मेवारी दिएकोले शाक्यले पुरानो मुद्दा टुंगाइदिन भन्दै बिहीबार सर्वोच्च अदालतमा निवेदन दिएका हुन् ।

शुक्रबार सर्वोच्चका न्यायाधीश अब्दुल अजीज मुसलमानको इजलासमा पेसी चढेको मुद्दामा सुनुवाई गर्दै न्यायाधीश मुसलमानले अन्तरिम आदेश दिएनन् भने आइतबार दुवै पक्षलाई बोलाउने आदेश गरेका थिए । साथै हितेन्द्रको मुद्दामा समेत सँगै सुनुवाई हुने भएको थियो । आइतबार सर्वोच्चका प्रधानन्यायाधीश प्रकाशमान सिंह राउत र न्यायाधीश शारङ्गा सुवेदीको संयुक्त इजलासले दुवैको मुद्दा हेर्न नभ्याइनेमा राखेको थियो । मंगलबार दुबै मुद्दामा एकसाथ सुनुवाई भइरहेको छ ।

अघिल्लो सोमबार बसेको मन्त्रिपरिषद्को बैठकले कुलमान घिसिङलाई बर्खास्त गरेर हितेन्द्र देव शाक्यलाई प्राधिकरणमा प्रबन्ध निर्देशकको जिम्मेवारी दिएको हो ।