सभामुखसँग रविको भेटवार्ता: सांसद पद निलम्बन फुकुवा गर्न आग्रह

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नो सांसद पद निलम्बन फुकुवाका लागि सभामुखसँग आग्रह गरेका छन्। मंगलबार बिहान सभामुख देवराज घिमिरेसँगको भेटवार्तामा लामिछानेले यस्तो आग्रह गरेका हुन् ।

यसअघि गत माघ १८ गते पनि उनले सभामुखसँग भेटेर निलम्बन फुकुवाको आग्रह गरेका थिए ।

‘अदालतमा टेकाइएको मुद्दाको आधारमा निलम्बन हुनु हुँदैन भनेँ, लामिछानेले सभामुखसँगको भेटपछि भने, ‘एउटा मान्छे सधै अदालत जाने भन्ने हुँदैन संसदको विषय संसदबाट निरुपण हुनुपर्छ ।’

प्रतिशोध राखेर यस्तो हुन गयो भने सरकारको संख्या नै तलमाथि नै हुन सक्छ भन्दै सभामुख घिमिरे पनि सचेत भएको उनको भनाइ छ ।

यस्ता गतिविधिले कुनै पनि सरकारले अर्को पार्टी र प्रतिस्पर्धी नेतालाई सक्काउन सक्नेतर्फ सचेत हुनुपर्ने उनको भनाइ छ ।

‘सभामुख पनि राजनीतिक अधिकार बन्न सक्नेमा चिन्तित हुनुभयो । उहाँ सकारात्मक हुनुहुन्छ,’ लामिछानेले भने ।

लामिछाने गत पुस ८ गते सांसद पदबाट निलम्बित भएका थिए । त्यसअघि, गत कात्तिक २ गते उनलाई पक्राउ गरिएको थियो । सहकारी ठगी, संगठित अपराध र सम्पत्ति शुद्धीकरण अभियोगमा मुद्दा दर्ता भएपछि संघीय संसद सचिवालयले कास्की जिल्ला प्रहरी कार्यालयको पत्रका आधारमा उनको सांसद पद निलम्बन गरेको जनाएको छ ।

रास्वपाका नेताहरू भने लामिछानेको निलम्बनलाई अनुचित भन्दै सभामुखले विवेक प्रयोग गर्न नसकेको आरोप लगाउँदै आएका छन् । पार्टीका नेताहरूले सांसद पद निलम्बनका लागि कास्की जिल्ला प्रहरी कार्यालयको जानकारी पत्र पर्याप्त आधार नभएको जिकिर गर्दै आएका छन् ।

लामिछाने सोबार पार्टी काममा फर्किएका छन् । पार्टी कार्यालयमा भएको बैठकमा उनी सहभागी भएका हुन् ।