काठमाडौं । प्रधानमन्त्री केपी शर्मा ओली बिमस्टेक (बहुक्षेत्रीय प्राविधिक तथा आर्थिक सहयोगका लागि बंगालको खाडी प्रयास) को छैटौं शिखर सम्मेलनमा सहभागिता जनाउन आज दिउँसो १ बजे थाइल्यान्डको राजधानी बैंकक जाँदैछन् ।
प्रधानमन्त्रीको भ्रमणका क्रममा थाई प्रधानमन्त्रीसँग द्विपक्षीय वार्ता हुने र पर्यटन तथा संस्कृतिका सन्दर्भमा दुईवटा समझदारीपत्रमा हस्ताक्षर हुनेछ। साथै दुई प्रधानमन्त्रीको उपस्थितिमा गैरसरकारी क्षेत्र बीचको ६ वटा समझदारीपत्रमा हस्ताक्षर हुने प्रधानमन्त्रीले सोमबार संसद्मा जानकारी गराएका छन्।
द्विपक्षीय वार्तापछि थाई समकक्षीसँगै संयुक्त प्रेस ब्रिफिङमा भाग लिने र थाई राजासँग भेटवार्तापछि थाइल्यान्डको एकदिने औपचारिक भ्रमण समाप्त हुने उनको भनाइ छ।
उक्त भ्रमणमा भारतीय प्रधानमन्त्री नरेन्द्र मोदी पनि जाने भएका छन्। भारतीय विदेश मन्त्रालयले जनाएअनुसार प्रधानमन्त्री मोदी भने २० चैत्रमा नै बैंकक जाँदै छन्। मोदीसँग भने भेटवार्ताको समय तय भइनसकेको प्रधानमन्त्री ओलीले बताएका छन्। भेटवार्ताको समय उपलब्ध गराइनसकेको प्रतिनिधिसभाको सोमबारको बैठकमा प्रधानमन्त्री ओलीले संकेत गराए।
दुई मुलुकबीच राम्रो सम्बन्ध रहेको सन्देश दिनेगरी प्रम मोदीसँग भेटवार्ता गर्ने प्रयास भए पनि भारतीय पक्षले सोमबार बिहानसम्म यसबारे कुनै जानकारी नगराएको ओलीले संसदमार्फत जानकारी गराएका छन्।
उनले संसद्मा सम्बोधन गर्दै भनेका छन्, ‘समय सीमित छ। अधिकांश सदस्य देशका नेताहरू २१ गतेमात्र बैंकक आइपुग्ने तालिका छ। बैंकक शिखर सम्मेलनलगत्तै सम्भव भएसम्म साइडलाइन वार्ताको योजना गरिएको छ।’
नेपाल–थाइल्यान्डबीच कूटनीतिक सम्बन्ध स्थापना भएको ६५ वर्षको इतिहासमा नेपाली प्रधानमन्त्रीको स्तरबाट थाइल्यान्ड भ्रमण हुन लागेको हो।
यो विषयमा प्रधानमन्त्रीले भने, ‘यसबीचमा यति नजिकको र ट्रान्जिट पोइन्टजस्तो त्यहीँबाट यता जाने, उता जाने तर औपचारिक भ्रमण चाहिँ नभएको अवस्था रहेछ। त्यसलाई अन्त्य गर्न यसपटक नेपालको तर्फबाट कार्यकारी प्रमुखको औपचारिक भ्रमण यो पहिलो पटक हुँदैछ। यस अर्थमा यो भ्रमण आफैंमा महत्वपूर्ण हो भन्ने ठान्दछु।’
प्रधानमन्त्री ओलीका अनुसार २१ चैत्रमा उनले थाइल्यान्डका प्रतिष्ठित व्यापारीहरूसँग भेटघाट–छलफल र दिउँसो एसियन इन्स्टिच्युट अफ टेक्नोलोजीमा सम्बोधन गर्ने तालिका छ। त्यसपछि उनी डिनरमा सहभागी हुनेछन्।
प्रधानमन्त्री ओली २१ चैत्र दिउँसो हुने बिमस्टेक शिखर सम्मेलनमा सहभागी भएर नेपालको तर्फबाट सम्बोधन गर्ने कार्यक्रम छ।
त्यसअघि बिहान ‘मेरिटाइम ट्रान्सपोर्ट कोअपरेसन अग्रिमेन्ट’ मा हुने हस्ताक्षर समारोहमा सहभागी हुनेछन्। २१ चैत्र साँझ नेपाली दूतावासमा आयोजना गरिएको रिसेप्सन (रात्रिभोज) मा सहभागी भएसँगै प्रधानमन्त्री ओलीको थाइल्यान्ड भ्रमण समाप्त हुनेछ।
परराष्ट्र मन्त्रालयका अनुसार प्रधानमन्त्रीको नेतृत्वमा बैंकक जाने नेपाली प्रतिनिधिमण्डल २५ सदस्यीय मात्र हुने भएको छ।
प्रतिक्रिया