चारवटा अदालतमा मुद्दा लगाएर मेरो शिरमाथि तरवार झुन्ड्याइएको छ: रवि लामिछाने

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले कांग्रेस र एमालेको सरकारलाई लुटतन्त्रको आरोप लगाउँदै ती दलहरूसँगको संघर्ष जारी राख्ने बताएका छन् । सोमबार पार्टी केन्द्रीय कार्यालय वनस्थली पुगेका लामिछानेले आफूले लुटतन्त्र मच्चाउनेहरूलाई खबरदारी गर्न चुप नबस्ने स्पष्ट पारे।

‘लुटतन्त्र मच्चाउनेहरूलाई खबरदारी गर्न म चुप बस्दिन । लुटतन्त्रलाई टुलुटुलु हेरेर बस्न सकिनँ, त्यसैले निस्किएँ,’ लामिछानेले भने, ‘मैले चारवटा अदालतमा मुद्दा भोगिरहेको छु, शिरमाथि तरवार झुन्डिएको छ। तरवार झर्छ भने म काटिन तयार छु, सम्मानित अदालतप्रति मेरो विश्वास छ ।’

उनले रास्वपा कुनै पनि दलको आगो ताप्ने पार्टी नभएको पनि स्पष्ट गरे । रास्वपाको गणतन्त्रप्रतिको निष्ठामा कुनै प्रश्न नगर्न पनि उनले अपील गरे।

‘जहाँ आगो बल्छ, त्यहाँ ताप्न जानु मेरो स्वभाव होइन,’ लामिछानेले भने, ‘तपाईंहरूलाई गणतन्त्रवादी हुनुहुन्छ कि छैन भन्ने प्रश्न गर्न खोज्नु सही होइन ।’

लामिछानेले कांग्रेस र एमालेको पार्टीलाई लोकतन्त्रको नाममा लुटतन्त्र मच्चाउने दल भएको आरोप लगाए । भ्रष्टाचारमा चुर्लुम्म डुबेकाहरूले आफूलाई जोगाउन वर्तमान सरकार गठन गरेको बताएका उनले कांग्रेस एमाले मिलेर सरकार बनाउँदा संसद्मा बलियो सशक्त सरकार बन्ने सम्भावना अन्त्य भएको बताए ।