काठमाडौं । नेपाल स्पोर्ट्स एन्ड इभेन्ट्स म्यानेजमेन्टले नेपाल सुपर लिगको तेस्रो संस्करणका लागि एनसेल आजियाटा लिमिटेडलाई टाइटल स्पोन्सरका रूपमा घोषणा गरेको छ ।
एनएसएल नेपालकै पहिलो फ्रेन्चाइजमा आधारित व्यावसायिक फुटबल लिग हो । शुक्रबार ललितपुरको द प्लाजामा आयोजित विशेष समारोहमा साझेदारीको घोषणा गरिएको हो । एनसेलले नेपालमा फुटबलको प्रवर्द्धन गर्दै नेपाली फुटबलप्रेमीको मन पर्ने खेललाई अझ बलियो बनाउन सहयोग गर्नेछ ।
सन् २०२१ मा स्थापना भएको एनएसएललाई एनएसइएमले अखिल नेपाल फुटबल संघको प्राविधिक सहयोगमा आयोजना गर्दै आएको छ । थुप्रै क्षेत्रीय फ्रेन्चाइज टोलीहरूको प्रतिनिधित्व गर्दै यो लिगले नेपालभर फुटबलप्रति व्यापक चासो र सहभागिता बढाइरहेको छ ।
एनएसएलको आधिकारिक खेल २९ मार्च २०२५ बाट सुरु हुनेछ । प्रतियोगितामा बुटवल लुम्बिनी एफसी, धनगढी एफसी, एफसी चितवन, झापा एफसी, काठमाडौं रेजर्स एफसी, ललितपुर सिटी एफसी र पोखरा थन्डर्स एफसीसहित सात टिमबीच प्रतिस्पर्धा हुनेछ ।
एनएसएलका प्रबन्ध निर्देशक श्रेयांस कार्कीले एनसेललाई एनएसएलको टाइटल स्पोन्सरका रूपमा स्वागत गर्न पाउँदा निकै उत्साहित भएको बताए । उनले साझेदारीले नेपाली फुटबललाई नयाँ उचाइमा पुर्याउने बताए ।
एनसेलका चिफ कमर्सियल अफिसर उमेर मोहसिनले एनएसएलसँगको सहकार्यले खेल विकासप्रतिको प्रतिबद्धतालाई प्रतिबिम्बित गर्ने बताए । ‘हामी फुटबलले समाजलाई जोड्ने र सकारात्मक परिवर्तन ल्याउने शक्ति राख्छ भन्नेमा विश्वास गर्छौं,’ उनले भने ।
एनसेलले गत संस्करणदेखि नै एनएसएलसँग सहकार्य गर्दै आएको छ ।
प्रतिक्रिया