कप्तान अनिल साहले एनपीएलका बाँकी खेल नखेल्ने, जनकपुरलाई धक्का

काठमाडौं । जनकपुर बोल्टसका कप्तान अनिल साहले एनपीएलका बाँकी खेल नखेल्ने भएका छन् । चितवनविरुद्धको खेलमा हातमा चोट लागेपछि साहले प्लेअफका खेल गुमाउने भएका हुन् ।

जनकपुरका टिम म्यानेजर अनुज जैसवालले अनिल साहले बाँकी खेल नखेल्ने पुष्टि गरे । खेलपछि बाहिर निस्किने क्रममा उनलाई चोट लागेको हो ।

जनकपुरले पहिलो क्वालिफायरमा भोलि सुदुरपश्चिमसँग प्रतिस्पर्धा गर्दैछ । जनकपुरका ओपनर साहले प्रतियोगितामा १३२ रन बनाएका छन् । उनी टिममा नहुने भएपछि जनकपुरलाई सुदूरविरुद्ध सकस हुने भएको हो । समूह चरणको खेलमा बोल्टसले सुदूरसँग ७२ रनको लज्जास्पद पराजय बेहोरेको थियो ।