रोमाञ्चक खेलमा सुदूरपश्चिमले पोखरालाई हरायो

काठमाडौं । सुदूरपश्चिम रोयल्सले पोखरा एभेन्जर्सलाई पराजित गर्दै रोमाञ्चक जित हात पारेको छ । १५४ रनको लक्ष्य पछ्याएको पोखरा १९.४ ओभरमा १४८ रनमै अलआउट भयो ।

आन्द्रेश गोसले सर्वाधिक ३६ रन बनाए भने रेमन रेफरले ३३ र किरण ठगुन्नाले ३२ रनको योगदान गरे । दिनेश खरेलले १५ रन बनाए। अन्य खेलाडीमा जेन मलिक १०, माइकल लिस्क ५, दिलीपनाथ १ रनमै आउट भए । विपिन खत्री, सुदीप अर्याल र कप्तान कुशल भुर्तेल खाता खोल्न असफल रहे ।

स्कट कुगेलेइनले उत्कृष्ट बलिङ गर्दै ५ विकेट लिए। हर्मित सिंहले ३ र सैफ जेवले २ विकेट हात पारे ।

यसअघि टस हारेर पहिले ब्याटिङ गरेको सुदूरले ७ विकेट गुमाउँदै १५३ रन बनाएको थियो ।

आरिफ शेखले अविजित ४२ रन बनाए । ब्राण्डन म्याकमुलेनले २३, कप्तान दिपेन्द्रसिंह ऐरीले २०, बिनोद भण्डारीले १४, हर्मित सिंहले १३, इसान पाण्डेले १०, सैफ जेवले ९ र स्कट कुगेलेइनले २ रन बनाए ।

पोखराका लागि कप्तान कुशल भुर्तेलले २ विकेट लिए भने सागर ढकाल, माइकल लिस्क र रेमन रेफरले समान १/१ विकेट हात पारे ।

यो जितसँगै सुदूरपश्चिमले ५ खेलबाट ४ जित र १ हारसहित ८ अंक जोडेको छ र दोस्रो स्थानमा रहेको छ । पोखरा भने प्रतियोगिताबाट बाहिरिसकेको छ र ४ अंकसहित सातौं स्थानमा छ ।