पुष्पा २ का नायक अल्लू अर्जुन किन परे पक्राउ ?

एजेन्सी । दक्षिण भारतीय फिल्म स्टार अल्लू अर्जुनलाई हैदराबाद प्रहरीले सोधपुछका लागि थानामा बोलाएको छ । फिल्म ‘पुष्पा २’ को विशेष प्रदर्शनका क्रममा मच्चिएको भगदौडमा एक महिलाको मृत्यु भएपछि उनीसहित केही व्यक्तिविरुद्ध मुद्दा दर्ता गरिएको छ।

हैदराबादको सन्ध्या थियटरमा ‘पुष्पा २’ को प्रदर्शनको आयोजना गरिएको थियो । प्रशंसकहरूले एडभान्समा टिकट लिएर फिल्म हेर्न पुगेका थिए । यसै क्रममा अल्लू अर्जुनको टोलीले उनी थिएटरमा आउने अचानक कार्यक्रम तय गर्‍यो । उनको उपस्थिति भएपछि प्रशंसकहरूमा उत्साह चुलिएर भीड नियन्त्रणबाहिर पुगेको थियो ।

प्रशंसकहरूको भीडमा मच्चिएको भगदौडका कारण एक महिलाको ज्यान गएको थियो । घटनापछि हैदराबाद प्रहरीले अल्लू अर्जुन र अन्य व्यक्तिहरूमाथि मुद्दा दर्ता गर्दै सोधपुछका लागि चिक्कडपल्ली प्रहरी थानामा बोलाएको छ ।

प्रहरीले घटनाको विस्तृत अनुसन्धान जारी राखेको जनाएको छ। यता, अल्लू अर्जुन र उनको टोलीले यस विषयमा औपचारिक प्रतिक्रिया दिएका छैनन् ।

समाचार एजेन्सी एएनआईका अनुसार, घटनाले प्रशंसकहरूको सुरक्षा व्यवस्थाप्रति प्रश्न खडा गरेको छ ।