कोटेश्वरको बालकुमारीमा आगलागी हुँदा तीन पसल जलेर नष्ट

काठमाडौं । कोटेश्वरको बालकुमारीमा एउटा घरमा आगलागी हुँदा तीन पसल जलेर नष्ट भएको छ ।

महानगरीय प्रहरी प्रभाग कोटेश्वरका अनुसार बालकुमारीस्थित सीसीआरसी कलेजसँगै स्वाभिमान श्रेष्ठको दुई तले घरमा विजुली सर्ट भएर बुधबार राति आगलागी भएको थियो ।

प्रभावका सहायक हवल्दार रुद्रप्रसाद गौतमका अनुसार आगलागीमा परि उक्त घरको पहिलो तलामा रहेको भोजराज भट्टको औषधी पसल डगेरा फार्मेसी जलेर नष्ट भएको छ ।

यस्तै आगलागीमा परि श्रेष्ठको घरसँगै एउटा पान पसल र मःम पसलसमेत जलेको छ । ति दुवै पसलसँगै रहेको जुम्बा डान्स सेन्टर पनि जलेर नष्ट भएको छ । आगलागीबाट भएको क्षतिको विवरण यकिन नभएको प्रहरीले जनाएको छ ।

पाँचवटा दमकलको सहयोगमा एक घण्टापछि आगो निभाइएको थियो । आगो निभाउन काठमाडौंका तीन र ललितपुरका दुईवटा दमकलका साथै प्रहरी परिचालन गरिएको थियो ।