टिकापुरमा ३८ वर्षपछि जहाज पुग्याे, हाेला त अब नियमित उडान ?

कैलाली ।टिकापुरमा विमानस्थलमा ३८ वर्षपछि जहाज अवतरण भएकाे छ । नेपाल वायुसेवा निगमकाे जहाजले सोमबार दिउसो नेपालगन्जबाट टिकापुरमा परीक्षण उडान गरिएको छ । टिकापुर नगरपालिका वार्ड नं १ स्थित बसपार्क नजिकै रहेको टीकापुर विमानस्थलमा सोमबार निगमको जहाजले परीक्षण उडान गरिएको हो ।

टीकापुर विमानस्थलमा नेपाल वायुसेवा निगमको ९एन एबीयु र र तारा एयरको ९एन एइभी कलसाइनको विमानले परीक्षण उडान गरिएको हो । संस्कृती पर्यटन तथा नागरिक उडड्यनराज्यमन्त्री अरुणकुमार चौधरीले तिहार लगत्तै नियमित विमान सञ्चालन गरिने बताए ।

उनका अनुसार नियमित विमान सञ्चालन सुदूरपश्चिम प्रदेशको पहाडी जिल्लाहरूमा गरिनेछ । स्वर्गीय गृहमन्त्री खड्गबहादुर सिंहले वि सं २०४१ सालमा विमानस्थल सञ्चालनमा ल्याएका थिए । तीन वर्षसम्म नियमित सञ्चालनमा आएको विमानस्थल विसं २०५२ पछिको द्वन्द्वकाल शुरू भएसँगै नियमित विमान सेवा रोकिएको थियो ।

१८ बिघा जग्गामा निर्माण गरिएको उक्त विमानस्थलमा झण्डै चार दशक लाग्दै गर्दा उक्त विमान स्थलमा नियमित उडानका लागि आज नेपाल वायुसेवा निगम र तारा एयरको विमानले परीक्षण उडान गरेको छ ।

टीकापुर विमानस्थलमा नेपाल वायुसेवा निगमको विमानले क्याप्टेन मनिष विष्ट, उज्जवल सिलवालसहित नेपाल नागरिक उड्डयन प्राधिकरणका कर्मचारीहरु ज्ञानेन्द्र भूल, इन्जिनियर सम्राट प्रधान, सुरेन्द्रप्रसाद यादव, युवराज रिजाल, एयरहोस्टेज डिम्पल भट्टराई एटिसी राजु महतोसहित १२ जनाको टोली लिएर परीक्षण उडान गरेको हो ।