चीनसँग पनि विद्युत व्यापारको कुरा गरिराखेका छौं: ऊर्जामन्त्री खड्का

काठमाडौं । ऊर्जा, जलस्रोत तथा सिंचाईमन्त्री दीपक खड्काले छिमेकी मुलुक चीनसँग पनि विद्युत व्यापारको सम्बन्धमा कुरा गरिरहेको बताएका छन् ।

आइतबार मन्त्रालयमा मन्त्री र सचिवका बीचमा कार्यसम्पादन सम्झौताका लागि आयोजित कार्यक्रममा बोल्दै मन्त्री खड्काले बंगलादेशसँगको विद्युत व्यापार सम्झौता ठूलो उपलब्धि भएको बताए । चीनसँग पनि विद्युत व्यापारका लागि कुरा गरिरहेको उनले बताए ।

अन्य छिमेकी राष्ट्रहरुले आफैँ विद्युत उत्पादन गर्दा पनि नेपालसँग किन्ने गरेको भन्दै चीनसँग पनि सोही अनुरुप आग्रह गर्नुपर्ने उनको भनाइ थियो । साथै चीनले नेपालको विद्युत किन्ने कुरामा आफू आशावादी रहेको मन्त्री खड्काले बताए ।

आर्थिक कुरामा जोड दिएर जनताको जीवनस्तर उकास्नका लागि आफ्नो ध्यान केन्द्रित रहेको भन्दै मन्त्री खड्‍काले निजी क्षेत्रले जलविद्युतमा गरेको लगानी पनि अन्तत: राज्यकै हुने भन्दै निजी क्षेत्रलाई लगानी गर्न अवरोध गर्न नहुने बतए ।

मन्त्री खड्काले भने, ‘जलविद्युतमा व्यक्ति, संस्था, निजी संस्थाहरु जजसले लगानी गरे पनि २५/३५ वर्ष पछाडि मुलुकको हुने हो । ६४ खर्ब २८ हजार मेघावाट विद्युत उत्पादन गर्नलाई लगानी गर्दैछौँ भनेर जुन फिगर भनिएको छ, त्यो पूर्ण रुपमा नेपाल सरकारको हुने हो । अहिले हामीलाई १० खर्बको चालु खर्च र ५/७ खर्ब जुटाउन हम्मेहम्मे छ । ऋण छ । विद्युत उत्पादनका लागि सरकारको सम्पत्ति हो यो । भोलि सबै नेपाली धनी हुने हो र प्रतिव्यक्ति आय बढाउने हो भनेर तल्लो तहको मान्छेसम्म बुझाउने दायित्व पनि हाम्रै हो ।’

यस क्रममा मन्त्री खड्काले बंगलादेशसँगको सम्झौतालाई अत्यन्त ठूलो उपलब्धिको रुपमा प्रशंसा गरेका थिए । ‘हामीले चीनसँग पनि कुरा गरिराखेका छौँ । सबै छिमेकीहरुले किन्छन्, उहाँहरु आफैँले पनि उत्पादन गर्नुहुन्छ, फेरि पनि किन्नुहुन्छ । तपाईंहरुले थोरै किन्दा हामीलाई राहत हुन्छ भने तपाईंहरुले किन नकिन्दिने भनेर उहाँहरुसँग आग्रह गर्दा नहोला जस्तो मलाई लाग्दैन । म आशावादी प्रकारको मान्छे पनि हो । आर्थिक कुरामा जोड दिएर जनताको जीवनस्तर उकास्नुपर्ने छ,’ उनले भने । यस्तै जलविद्युतको क्षेत्रमा तल्लो तहको मान्छे पनि धनी हुनेगरी मोडालिटी बनाउनुपर्ने उनको भनाइ थियो ।