खादा-मालाले एयरपोर्टको सुन्दरता बिगार्यो, नलगाइ आउनुः विमानस्थल
काठमाडौं । त्रिभुवन अन्तर्राष्ट्रिय विमानस्थलले खादा नलगाइ आउन यात्रुहरुलाई आह्वान गरेको छ । विमानस्थलले एक सूचनामार्फत् विमानस्थलमार्फत् विदेश जाने यात्रुहरु खादामाला नलगाइ आउन भनेको हो ।
त्रिभुवन अन्तर्राष्ट्रिय विमानस्थल नागरिक उड्डयन कार्यालयका अनुसार सुरक्षा जाँचको क्रममा यस्ता खादा मालाले विमानस्थलको सुरक्षा उपकरणहरु (एक्स–रेहरु), कन्भेयर बेल्ट तथा स्केलेटरहरुमा अडकीइ उपकरणहरुलाइ गम्भीर क्षति पुर्याई रहेका छन् । यसैगरी यात्रुहरुले खादा तथा मालाहरु विमानस्थलका विभिन्न क्षेत्रहरुमा छाडी जाने समेत गर्नाले यसबाट विमानस्थलको सौन्दर्यतामा समेत नकारात्मक असर पुग्ने गरेको विमानस्थलको भनाइ छ ।
हवाई यात्रुले त्रिभुवन अन्तराष्ट्रिय विमानस्थल स्थित आन्तरिक तथा अन्तराष्ट्रिय टर्मिनल भवन प्रवेश गर्दा विदाई स्वरूप साथमा लगाई आउने वा ब्यागमा झुन्ड्याई बाधी ल्याइने खादाले यस्तो असर पार्ने गरेको विमानस्थलको ठहर छ ।
तसर्थ विमानस्थल टर्मिनल भवन प्रवेशका दौरान सुरक्षा जाँचका समयावधि भर यस्ता माला, खादा आदि वस्तुहरु प्रयोग नगर्न र यात्रुले सँगै लानु पर्ने भएमा आफ्नो ब्यागभित्र नदेखिने गरि राखेर मात्र लग्न विमानस्थलले अनुरोध गरेको हो ।
केही दिन अघि खादा लगाएर एयरपोर्ट पुगेका एक युवकलाई प्रहरीले हप्काइदप्काइ गरेर खोल्न लगाएको भिडियो सार्वजनिक भएको थियो । त्यसयता खादामालाको विषय तातेको छ ।
क्लिकमान्डु
