आज विमानस्थल वरिपरिको आकाशमा कालो धुवाँ देखिने, विमानस्थल बन्द हुने

काठमाडौं । आज आधाघण्टा त्रिभुवन अन्तर्राष्ट्रिय विमानस्थलको उडान अवतरण प्रभावित हुने भएको छ ।

सोमबारका अपराह्न १ बजे हवाई उडान तथा सुरक्षा र मेडिकल एवं उद्धारसँग सम्बद्ध विभिन्न निकायहरुको सहभागितामा विमानस्थल संकटकालीन योजना अनुसार गरिने विभिन्न अभ्यासहरु मध्ये एयरक्राफ्ट एक्सिडेन्ट इन एयरपोर्ट सम्बन्धि पूर्णकालिन अभ्यास हुने भएको हो ।

अभ्यासको मुख्य उद्देश्य संकटको अवस्थामा सहभागि हुने विभिन्न निकायहरु बीच सहयोगको अभिवृद्धि गराउने तथा सहभागि निकायहरुले निर्वाह गर्ने भूमिका तथा जिम्मेवारीको मूल्याङ्कन गरी सम्बद्ध पक्षको क्षमतामा अभिबृद्धि गराइ यस्तो दुर्घटनाको अवस्थामा जनधनको क्षति न्यून गराउने र विमानस्थलको संचालन छिटो भन्दा छिटो सुचारु गराउने रहेको नागरिक उड्डयन प्राधिकरणले जनाएको छ ।

अभ्यासको सिलसिलामा विमानस्थल वरिपरिको आकाशमा कालो धुवाँका साथै दमकल, सुरक्षाकर्मी, एम्बुलेन्स तथा अन्य गतिविधिमा तिव्रता आएको पनि देख्न सकिने क्यानले जनाएको छ । साथै अभ्यासको क्रममा १ बजेदेखि साढे १ बजेसम्म विमानस्थलको अपरेशन बन्द हुने भएकोले नियमित उडान अवतरण प्रभावित हुन सक्ने प्राधिकरणले जनाएको छ ।

यो विमानस्थल संकटकालिन योजनाको अभ्यास गर्नु पर्ने अन्तर्राष्ट्रिय नागरिक उड्डयन संगठनको मापदण्ड तथा यस विमानस्थलको एयरपोर्ट इमरजेन्सी प्लानअनुसार गरिने योजनाबद्ध अभ्यास भएको जनाएको छ ।