यस्तो छ महानगर र ई: बीचको ४ बुँदे सहमति

काठमाडौं । काठमाडौं महानगरपालिका र आन्दोलनरत ई: बीच सहमति जुटेको छ ।

फुटपाथ व्यवसायीको पक्षमा महानगरविरुद्ध उभिएर आन्दोलन गरिरहेका ई: बीच बुधबार राति सहमति जुटेको हो ।

मंगलबार दुई पक्षबीच वार्ता भएर चार बुँदे सहमतिपत्र तयार भएको थियो । तर सहमतिको ४ नम्बर बुँदामा महानगर प्रमुख बालेन्द्र शाह(बालेन) ले संशोधन गरेपछि त्यसलाई आन्दोलनरत पक्षले अस्वीकार गरेको थियो ।

तर आज फेरि भएको वार्तामा चौथो बुँदालाई संशोधन गरेर सहमति जुटाइएको हो ।
आज भने दुई पक्षबीच कानुनले निषेध गरका स्थान बाहेकका अन्य स्थान पहिचान गर्न महानगरले एक हप्ताभित्र पहल गर्ने गरि सहमति जुटेको छ ।

‘साविकमा फूटपाथ, सार्वजनिक स्थलमा व्यापार गरेका व्यवसायीहरुका लागि महानगरपालिकाभित्र कानुनले निषेध गरेका स्थान बाहेक अन्यत्रका उपयुक्त स्थल पहिचान गर्न महानगरपालिकाले आजको मितिले एक हप्ताभित्र पहल गर्नेछ’ संशोधित सहमतिमा भनिएको छ ।

सहमतिपछि प्रदर्शनरत ई:ले पत्रकार सम्मेलन गर्दै आन्दोलन स्थगन घोषणाको तयारी गरेका छन् ।

उनी अहिले ९ बजेसम्म गरेर १९९ घन्टा उभिएका छन् ।