महानगर र राप्रपाबीच सहमति, २१ दिनभित्र पार्टी कार्यालय खाली गर्ने

काठमाडौं । राष्ट्रिय प्रजातन्त्र पार्टी (राप्रपा) ले २१ दिनभित्र धुम्बाराहीस्थित केन्द्रीय कार्यालय खाली गर्ने भएको छ ।

राप्रपा र काठमाडौं महानगरपालिकाबीच २१ दिनभित्र धुम्बाराहीस्थित कार्यालय रहेको घर खाली गर्ने सहमति भएको हो । यसअघि महानगरले गत शुक्रबार कार्यालय खाली गर्न ३ दिनको समय दिएको थियो ।

कार्यालय खाली नगरेपछि महानगरले सोमबार उक्त भवनमा डोजर लगाउने तयारी गरेको थियो । तर राप्रपाका कार्यकर्ताहरुले कार्यालय भत्काउन नपाइने भन्दै सडकमा गाडी तेर्स्याएर बिरोध गरेका थिए ।

त्यसपछि जिल्ला प्रशासन कार्यालय काठमाडौंको समन्वयमा राप्रपाका नेता र महानगरबीच छलफल भएको थियो । त्यसक्रममा २१ दिनभित्र घर खाली गर्ने सहमति भएको हो ।

बिजुलीको हाइटेन्सन लाइनमुनि घर बनाइएको र नक्सापास नरहेको भन्दै महानगरले घर भत्काउने तयारी गरेको थियो ।